اليوم حابة أتكلم عن تكاليف بعض الإجرائات العلاجية اللي عملتها تلبية لطلب أحد الزوار .
بالبداية راح أذكر المبالغ بشكل تقريبي لإني ناسية بعضهم والفواتير مو عندي.. و نستغل هالفرصة للتعرف على فروقات الأسعار للمراكز اللي زرتها .
أولا بالنسبة للتنظيف الدوري للأسنان جربت كذا مركز على طول هذي السنوات فماأذكر التكلفة بالضبط لكن بعض المراكز مثل مركز الدكتور مساعد الزلال تقريبا يكلف 120 أو 140 ريال ,, مركز امج 240 ريال ,, مركز الحبيب تقريبا 200 وشي ,,
وبالنسبة للفرق بالشغل لقيت أفضل واحد د.عبد الهادي في مركز امج تنظيف بدقه ,, أنا ذكرت التنظيف الدوري لأنه مهم لكشف أي تسوس للمحافظة على الأسنان من الجير أو البلاك ومهم أكثر بوجود البريسز ,, فبدل مايكون التنظيف كل 6 شهور راح يكون كل 4 شهور تقريبا << على فكرة هالنقطة أهملتها ,, السنة اللي فاتت نظفت يمكن 3 مرات والحين ولا مرة يعني صار لي 6 شهور وصايرة لثتي ملتهبة فخلوكم أحسن مني ^_^
نبدأ بدكاترة البريسز والجراحين
بالنسبة لقيمة الاستشارات برضو تتفاوت ,,
مركز الحبيب 100 ريال
مركز صفد 100 ريال
مركز امج 200 ريال
مركز سيجال 150 أو 200 نسيت
بالنسبة لمركز امج الاستشارة كانت بيوم ولما قررت أبدأ معهم عطوني موعد ثاني لأخذ الطبعات و الأشعة والصور ووضع الخطة المناسبة تكلفتهم التوتال 1700 ريال وهي من ضمن تكاليف البريسز ,,
بعدها موعد لتركيب السبيسرز اللي هو مطاطات صغيرة و مااذكر طلبوا مني شي ,, بعد يومين تركيب التقويم للفكين فوق وتحت يمكن أخذوا مني 2400 و برضو هو من ضمن التكاليف الإجمالية للتقويم ,,
بعد فترة عطوني موعد عشان يشوفني الجراح د.عثمان الطويرقي بنفس عيادة د.عادل الهدلق وشافوني الاثنين سوا بس مااتذكر كم طلبوا مني ولا ناقشت د. عثمان بتكاليف العملية ,,
بعد مااتفقوا عالخطة حولوني على الدكتورة مريم الهندي لخلع 4 ضواحك هي بمركز امج و أتوقع تشتغل برضو بسيجال مو متأكدة خلع الضرس الواحد كلفني 240 ريال ,,
بالنسبة للتقويم الجراحي بمركز امج يكلف 20 ألف تدفع بالتقسيط كل شهر 750 ريال ,,
بالنسبة لأضراس العقل أنا قرر لي الدكتور ادهارد جاكوب << اذا موغلطانة بالاسم هو الماني بمركز الحبيب أخلعهم من قبل ماأركب البريسز بامج وكانوا كاتبين لي بالخطة العلاجية المتوقعه انها راح تكلف 600 ريال لكل ضرس ,, لكن كنت مفضلة أخلعهم بنفس وقت العملية ويكون التعب واحد لكن د.عادل نصحني أخلعهم قبل ,,
الجهة اليمنى رحت لسيجال عند الدكتور ناصر النوح ميزته هو والدكتور زهير حيدر انهم يحسبون قيمة الخلع بحسب الشغل اللي يحتاجه الضرس ,, طبعا مارحت للدكتور زهير بس بما لاني ماعمري أخذت موعد الا أجلته :P فأحيانا كانت مواعيد سيجال ماتناسبني فأكلم صفد ^_^ فوقتها سألتهم كم يكلف تقريبا فكانوا يردون انهم مايحددون الدكتور هو اللي يحدد فالسعر مو ثابت مثل مركز الحبيب
أنا مو ذاكرة كم كلفني الضرسين بالضبط لأن واحد كان سليم والثاني مايل بس مو مطمور ويحتاج جراحة فأتوقع السليم كلفني 200 وشي والمايل يمكن 500 ريال ,,
بالنسبة للجهة الثانية رحت للدكتور صالح البازعي بالحبيب ,, كما قلت سابقا الدكتور ناصر كان بإجازة ^_^ ,, وذاكرتي المصدية ولله الحمد ماراح تنسى حدث صار له اسبوعين << ترى هذا أقصى شي :P فكلفني 1300 ريال قيمة الكشف 100 والخلع لكل ضرس 600 ريال مع ان واحد منهم سليم جدا والثاني يحتاج جراحة لكن شكل أسعارهم ثابتة ,,
أما الحشوات
ضاق صدري لما تذكرت الحشوات T_T ,, لإني مستغربة من شغله كنت رايحة أنظف أسناني تنظيف عادي وسألت الدكتورة فيه أي تسوس قالت لا أسنانك كلها سليمة وبعد يمكن 4 أو 5 شهور فجأة صار عندي 5 أسنان متسوسة شلون ماأدري بالبداية رحت على أساس سن واحد طلعوا 5 ياحسرتي ,,
نظفتهم عند الدكتور عبد الله الزيد بامج بس التسوس كان سطحي بـ 4 أسنان والسن الخامس كان بطبقتين فالاسعار لكل سن تختلف ,, استخدم لي الكمبوزت اللي هي الحشوات البيضاء ,, و أتوقع التكلفة كانت بـ 2000 ريال مو متذكرة ,,
أوفففففف ياغثى هالأسنان ماراح نخلص طووول عمرنا لا ويبيلها ميزانية جامدة بعد ,, لو اني مجمعة هالمبالغ وفصلت لي طقم أسنان كان مرتاحة خخخخخخخخخخخخخخخخ
لكن الحق ينقال اللي يبي شغل توب ويكون باله مرتاح لازم يدفع ^_*
ان شاء الله قدرت أفيدكم بفروقات الأسعار
^_^
