زيارتي الثالثة و الأخيرة للجراح

يوم السبت قبل العملية بأربع أيام قابلت الدكتور صالح البازعي

وهذي آخر زيارة قبل العملية عشان أسأله عن بعض الأشياء و نتناقش بالخطة

طلبت منه يبدأ بالشرح و كان انسان رائع وصريح حبيت هالميزة فيه كثير
كان يشرح لي ويتأكد اني فهمت عليه

قال لي بالبدايه انه حاط اعتبارات كثيره لحالتي يعني مقاييس الوجه و تعديل العضه يعني اللي فهمته مايبي يعدل شي على حساب شي ثاني

شرح لي الخطه وصعقت من كمية الأرقام والطريقه اللي بيحرك فيها الفك ههههههههههههههه
غير لأني طول هالسنين كنت متوقعه اني محتاجه بس رفع بمقداركبير وترجيع بسيط للفك العلوي ومتخيله ان التغير ماراح يكون كبير بدرجه كبيره

بس الخطه الجديده هي
تقليل مقدار رفع الفك العلوي الى 6 او 7 ملم مع ترجيع كبير بحدود 10 ملم O_o واحتمال تقديم الفك السفلي 2 الى 3 ملم O_o
وراح يكون فيه اجرائات ثانيه مثل رفع المنطقة الامامية من الفك العلوي اكثر من المنطقة الخلفية وهذا راح يحل لي مشكلة العضة العميقة
وغير كذا قال فيه احتمال الجأ لاستطالة الشفة العلوية هو اتوقع برايه مقدار الرفع ماراح يكفي لتغطية كل اللثه بما ان شفتي العلوية قصيره

هو صح تقنيا لما شرح لي حسيت هالخطة افضل من القديمه بس عجزت اتخيل كيف بيكون شكل وجهي
باكون انسانه ثانيه تماما ,, كنت خايفه ان كمية الترجيع الكبيييره بتعطيني شكل اكبر من عمري
والله وهو يشرح لي تخيلت وجه الساحره ام مكنسه ههههههههه ذقن بارز ,, فك علوي داخل,, وخشم طوييييل خخخخخخخ

هو بان علي القلق وكل شوي اقول وااو ههههههههههه
انا بس اللي صدمني كمية الترجيع هي اللي شتتني كثير وهو كان قلقان منها لانه لو مارجع الفك بهالكميه راح يضطر يقدم الفك السفلي
قال لي أنا مابيك تتفاجأين لو عملناها على الفكين ,, انا قررت تكون عمليتك على مسارين ياتنعمل على الفك العلوي فقط اذا الوضع سمح له لانه فيه حدود ببرد العظم عشان ماتتأثر جذور الاسنان و حدود بمقدار الرفع عشان مانصدم بقاعدة الجمجمه
و اذا ماسمح له الوضع ممكن يلجأ للفك السفلي بحيث انه يفصله من قواعده ويقدمه عشان تتضبط العضه

وش رايكم بالمصطلحات الرنانه :D ههههههههههههههههههههههههه
المصيبه ابوي كان معي ويسمع هالكلام اللطيف العذب كنت التفت عليه كل شوي اشوف تعابير وجهه خخخخخخخ

طبعا أكد لي د.صالح ان النتيجه راح تكون لصالحي
بصراحة حبيت ثقته بنفسه وهذا اللي خلاني أكون مصره لأني واثقه فيه بعد رب العالمين

بعد ماانتهى من الشرح جاء دوري بالاسئلة ومنها :


1. كم مدة الاقامة بالمستشفى؟
قال لي 3 ايام
العملية بمستشفى المملكه يوم الاربعاء 6/7/2011
واطلع من المستشفى يوم الجمعه.

2. كم راح يستمر وانا فاقدة الاحساس؟
قالي بالفك العلوي اقصى حد 6 شهور
بالفك السفلي راح يطول اكثر.

3. الى أي مدى راح يكون التغيير بالانف؟
قال قبل العملية ناخذ قياسات الانف ونحاول بقدر الامكان نحافظ عليه راح يخيط الجوانب وقال التب ماراح يتغير
بس قال اي تغيير بالفك العلوي لازم يتبعه تغيير بشكل الانف وهذا شي طبيعي وحتمي بس قال التغيير راح يكون للافضل ومناسب لوضع الفك الجديد.

4. كيف راح تكون شكل الشفايف وحجمها؟
قال الحجم ماراح يتغير بس ممكن تلاحظين ان الشفة العلوية نزلت لاني بارجع الفك العلوي ومع الاستطالة ممكن الشفه العلويه تفرش شوي بس هالشي راح يكون لصالحك.

5. هل العملية نسبة نجاحها عاليه ؟
قال انا شايف ان النتيجه بتكون جيده وان شاء الله ربي يكتب اللي فيه الخير.

6. احتاج نقل دم ؟
قال لا ماتحتاجين.

7. احتاج surgical splint و تقفيل للفم وكم مدة التقفيل ؟
قال ايه ضروري ومدة التقفيل من 10 ايام الى 3 اسابيع على حسب قوة العظم.

8. هل فيه امكانية للتحكم بالغثيان والاستفراغ؟
قال نعطي ادوية قوية للغثيان بعد العملية مباشره ويستمر مفعولها 12 ساعه
وبالنسبه للاستفراغ لو حصل فهي مو قضية كبيره.

9. كيف شدة التورم وحجمه؟
قال بعد العملية مباشرة راح تتورم منطقة الشفة العلوية وبالعادة التورم يكون كبير اول ايام العملية ويبدأ يخف بس يستمر لمدة 3 اسابيع تقريبا و بعدها يكون يوم خفيف ويوم كثير.

10. هل تنصحني بشي معين الى يوم العملية؟
قال قبل العملية مافي شي معين غير انك تتغذين كويس ولا تفكرين كثير ,, بس بعد العملية ابيك تساعدينا اغلب البنات تمر بحالة اكتئاب ويمتنعون عن شرب السوائل بسبب الم الحلق اللي يسببه انبوب التخدير ويمتنعون عن الحركه وهالاشياء تسبب مشاكل كثيره
منها الجفاف والصداع والدوخه وكل يوم يمر يكون اسوأ من اللي قبله بسبب قلة السوائل والحركه وحتى المعدة راح تتأثر لان المريض اثناء العملية يبلع كمية دم والدم اصعب شي تهضمه المعده فيحصل عسر هضم وامساك ,, قلت له لاتوصي حريص أصلا عارفه كل شي و حافظة اللي بأمر فيه خخخخخ

11. فيه تصوير فيديو للعمليه؟
خخخخخخخخ هالسؤال تحفه قال لا مافي تصوير بعدين قال اهاا دكتور عادل الهدلق خبرني ان عندك موقع وش نوعه
هههههههه انحرجت ساعتها ,, قال له ابوي ايه نبي فيديو العملية عشان ننزلها بالبلوق سبوت :P
قلت له مدونه شخصيه اتكلم فيها عن تجربتي بالتقويم والعملية انبسط بالفكره وشكرني عليها.


انتهت الزياره لكن قبل مااطلع طلب مني أمر عليه و آخذ منه اوراق تخص العملية
اخذها معي قبل ماأروح لمستشفى المملكه عشان اقابل دكتور التخدير.