My Big Day :D,, I'm alive :P

يوم الأربعاء
5-8-1432
6-7-2011


صحيت الساعه 8 ونص
بالبدايه كنت متبلده مااحس بشي غير يمكن جاني احساس كأن عندي اختبار خخخخخ بس الحمد لله مذاكره كويس :P
تجهزت ورحت اسلم على امي !_! ساعتها بغيت انهار كانت اصعب لحظه مسكت نفسي قدامها وطلعت بسرعه مع اختي وابوي,,
وانا بالسيارة كانت لحظات صمت نزلت دمعتي غصب كنت اتمنى اني اروح لحالي ولا اشوف احد
صعب يكون الشخص سبب لقلق اهله ويشوف نظرات الخوف والترقب بعيونهم.

مستشفى المملكه قريب من بيتنا بس حسيت ان المشوار طويل مع الافكار اللي كانت بخيالي

الساعه 10 الصباح تقريبا كنت بالمستشفى
خلصت كل الاجرائات ودلوني لمكان غرفتي
العملية تبدأ الساعه 12 فكان فيه وقت كااافي للوساوس والافكار خخخخخ



الغرفه نوعا ما كبيره بالدور الرابع وفيها شباك كبير يحسسك بطول اليوم
المنطقة اللي فيها المستشفى مره هاديه حتى المستشفى هاااادي
كانت تجيني لحظات اني انا الوحيده اللي بالمستشفى خخخخخخ
تجولت بالغرفه مرتبه وحاطين لي لبس العمليات عالطاوله


بعدها دخلت النرس ومعها ملفي وسالتني اسئلة مكرره وعطتني الملف اوقع هالورقه

^
قهرني آخر بند كنت أبي احتفظ بالعظام اللي بيستأصلونها عندي ماعطوني اياها :(
هههههههه


استغليت الوقت بقراءة القرآن والاستغفار والدعاء وحسيت براحه الحمد لله
على الساعه 11 لبست وودوني حتى وصلت لغرفه صغيره قبل غرفة العمليات

الممرض اللي شايل معه ملفي احسه هادي وحزين خخخخخ
لما وصلني للغرفه الصغيره قبل غرفة العمليات وهو جالس يرتب سألني ‏
are u nervous?
I said yes a little but i'm excited at the same time
قال اوه good
بس كان هااادي و كأنه خايف خخخخ
لما طلع قال
I wish u luck and have a nice day
مادري ليش خفت بعدها هههههههه

جلست انتظر وبعدها دخل واحد من طاقم التخدير سوري او لبناني وركب لي المغذي وسالني اسئله ويحاول يلطف الجو وكل واحد يدخل يحاول يلطف الجو ولاشعوريا اضحك من غير استيعاب خخخخخخ

بعدين جا دكتوري د.صالح البازعي ومعه مساعد بس نسيت اسمه وطمني ان كل شي بيكون تمام
وقال لي روقي شكل وجهي صاير اصفر ساعتها هههههههه
سالني اذا عندي شي حابه اسأل عنه قلت له اني مسويه تعديل للحاجز الانفي زمان قال مو مشكله اذا مال راح اعدله
وبعدين بدأ يشرح لي وللمساعد وش بيسوي
نفس الكلام اللي قاله لي بزيارتي الاخيره

طبعا دكتور صالح مرررررررررره صريييييح يتكلم معي كأي جراحة مو مريضه بتدخل غرفة العمليات بعد دقيقتين ههههههههههههههههههههههه
هو عارف من الأول عدم اقتناعي بالفكين فجلس يشرح ليش بيلجأ لتقديم الفك السفلي
وقال مابيك بعد ماتقومين تتفاجأين اذا سويناها عالفكين
بس باحاول بقدر الامكان انها تصير عالفك العلوي بس
وكان معه المساعد ويشرح له برضو وأنا كل شي أسسسسسسسسمعه
!_!

خخخخخخخخخخخ طبعا اسمع وانا مادري شاقول يااقول خلاص بطلت ولا اخلصوا خدروني
مع اني سامعه هالشي منه قبل بس وقعها عظيم قبل العملية بدقايق هههههههههههه
على طول تخيلت ان الفك كله بيطلعه برا الوجه وبيتجول بين يدينهم خخخخخ

بعد ماطلعوا جلست ادعي ربي
طبعا من قبل ماادخل وانا ادعي اللهم لاسهل الا ماجعلته سهلا وانت تجعل الحزن ان شئت سهلا
اللهم اني استودعتك نفسي وعرضي وعافية بدني وبعد سماع كلام الجراح هههههه جلست اقول اللهم اني استودعتك اسناني وخشمي وجمجمتي واعصابي فاحفظهم لي
وكل دعاء او ايه تخطر على بالي جلست ارددها

بعدها دخل واحد مصري من طاقم التخدير مرره رهيب واظن هو د.ابراهيم موسى بس ماسألته
قال لي انوسنس انتي مستعده؟ ,, الحين بتدخلين طبعا انا مبتسمه خخخخخخ والله من السباهه اللي جاتني
قال توكلي على الله ماراح تحسين بشي وكلها 5 دقايق وتصحين ماتحسين بالمده ابدا
دخلني غرفة العمليات ياهي كئيبه هالغرفه ومظلمه
وبكل كورنر جهاز كبير مناظير واجهزة قياس النبض والقلب
بس كل الطاقم يتحركون بسرعه كانهم نحل كل واحد ومهمته
جلسوا يركبون الاجهزة على صدري ويدي
حطوا لي قياس الضغط وبرضو على اصبعي قياس النبض

يمكن بدأ الارتباك يبين خخخخ
جلس الدكتور المصري يقرا علي و يقول لي على ادعية ارددها وراه ومره كلامه ريحني الله يجزاه خير
حط لي قطرات بخشمي يمكن عشان ترطب المجرى قبل مايدخلون انبوب التنفس

التخدير كان عن طريق ابره بالوريد بديت اتخدر وبدت الاصوات تروح وحطوا لي الماسك تنفست و بعدها ماحسيت بالدنيا

طبعا العمليه هي رفع وترجيع للفك العلوي
وهذا مقطع من غرفة العمليات مباشره لمريض عنده تقريبا نفس مشكلتي

تــــحـذيــــر

المقطع دموي وفيه تكسير عظام :P
يبيله قلب قوي :)




طبعا مر الوقت بدون مااحس مادريت الا هم يقوموني الدكتور المصري اللي كان يهزني عشان اتنفس و اصحى
ويقول قولي وراي الحمد لله انتي بخير وخلصتي
افتحي عيونك

كنت اسمع اصوات الاجهزة واسمعهم بس مو مستجيبه للي يقولونه كأني بحلم
كنت احس باحد يهزني ويربت على كتفي عشان اصحى
بس كنت ابي انااام ومو مستوعبه انا وين ومين اللي يكلمني
كان يقولي خذي نفس عميق
ويسالني اذا اسمعهم كنت اهز راسي بايه
قالي افتحي عيونك و تكلمي قولي الحمد لله
استجابتي ضعيفه بالبدايه بس شوي شوي صرت اتحرك وافتح عيوني واتكلم
اول شي سويته تحسست فكي السفلي وشفايفي السفليه فرحت كثير الحمد لله كنت احس فيها واشرت لهم فك او فكين ابي اتأكد قالوا الحمد لله فك واحد ,,
بالرغم من التعب والدوخه اللي كنت فيها بس
كان ودي اسجد سجود شكر ساعتها على هالنعمه اللي ربي تفضل بها علي
قلت لهم يطمنون اهلي


طبعا ماقصر دكتور صالح كلم اهلي وقالهم اني كويسه والعملية تسهلت على فك واحد اللهم لك الحمد والشكر
يعني العمليه استغرقت تقريبا 3 ساعات ونص

مااتذكر كم جلست بغرفة الافاقه يمكن ساعه
بعدها ودوني لغرفتي وكان اغلب الوقت دايخه وصعب افتح عيوني
كانت فيه الام نوعا ما بالفك والحلق وصداع حطوا لي كمادات ثلج حوالين الوجه وماسك الاكسجين
حسيت باهلي يوم شافوني اول مره بس كنت دايخه وماقدر افتح عيوني

بديت اصحصح شوي وقلت لاهلي ابي اشوف نفسي خخخخخخ
قال لي ابوي اصورك
قلت لا ماينفع ابي مرايتي السحريه خخخخخخخخ
لما شفت وجهي بصراحه منظر مقرف خخخخخخخ

كيف الصوره حلوه :D
مالقيت صورة تصف الحاله ومالقيت الا هالحلوه خخخخ مره نظيفه ومرتبه عكس واقعي المرير :P

كان وجهي يلمع وكأنهم ممسحين وجهي بماده لونها أصفر يمكن معقم الله اعلم
وفيه شوية بقع دم متناثره بالارجاء :P
جفوني كانت مره متورمه وحمرا حتى رموش عيني احس عليها شي ناشف
طبعا مثل مانتوا شايفين بالصوره خشمي كان ينزف
وحتى كان شكل الخشم يضحك صايره فتحه اكبر من فتحه و التب راقي لفوق صاير مثل الزحليقه
وفيه جروح على زوايا الفم والشفايف مره متورمه
بس باقي الوجه مو متورم كثير
كانوا حاطين لي بلاسترز على منطقة الشنب فوق الشفه العلويه وهذا يخفف من حدة التورم
خصوصا لاني مسوية استطاله للشفه العلويه
وبرضو بلاستر صغير بين حواجبي قالي الدكتور فيه جرح صغير بين الحواجب بسبب مسمار القياس
اتوقع نفس المسمار اللي استخدموه عالمريض بمقطع الفيديو اللي فوق :D

بالنسبه للالام مافيه الام قويه ابد اكثر شي صداع بس أقدر أصف الوضع بانه عدم راحة اكثر من آلام
لان وضعية الفك جديده والسبلنت اللي حاطينه بفمي كان مصعب الكلام
وبوجوده احس تسكير الفم صعب كان طول الوقت فمي مفتوح وينشف لاني اتنفس منه


هذا السبلنت قطعة بلاستيكيه شبه شفافه تنحط عالاسنان العلويه


شكلها بفمي مثل هذي الصوره


بس أنا ماربطوا فمي بالمطاطات بالبدايه
كنت اقدر افتح فمي

اكثر شي كان يضايق هو الم الحلق بسبب انبوب التخدير
وانسداد الخشم
كانت عيوني حمرا ومااحب اركز ع التي في
طول الوقت دايخه وكل شوي انام

كانوا مانعين مني الاكل والشرب حتى كملت ساعتين من وصولي لغرفتي
بعدها اعطوني شوية مويه بارده وقالوا حاولي تشربين
واذا مااستفرغتي نعطيك اول وجبه بعد ساعتين

الشرب اول مره كان شوي صعب
اعطوني اكواب صغيره للشرب



كنت احس ان المويه بسرعه تنبلع بغيت اشرق خخخخخخ
مو مثل اول فيه مسافه تمشي فيها السوائل هههههههه
قال الدكتور عشان رجعنا الفك كثير بتحسين بهالشي طبيعي بتتعودين بعدين
والشي الثاني اللي لاحظته
كنت لما ابلع او لما اسكر فمي واسناني اللي تحت تضرب بالسبلنت
احس فكي يتحرك هههههههه مادري وسواس او صدق يتحرك :P
لما قلت للدكتور قال لا لسا ماتعودتي عالسبلنت لما تضربين فيه يتحرك ,, بس مو الفك يتحرك

بعد مرور ساعتين جابوا اول وجبه
كانت ايسكريم وعصير تفاح
كنت اضغط على نفسي عشان اشرب واكل بالرغم من وجود الم الحلق كان البلع صعب

بالنسبه للعاب كان اول يوم غليظ وكثير
بعد مااشرب او اكل اطلب النرس عشان تشفطه لي
بس ماكان فيه نزيف من الفم شي بسيييط مره

بالنسبه للاحساس
كان نص وجهي تقريبا مااحس فيه ابدا
من بداية جفوني السفليه الى شفافي العلويه
طبعا شامله الخدود والخشم والاسنان العلويه واللثه والشفايف العلويه
تقريبا اقدر اصف حدوده من خلال هذي الصوره

المربع هو حدود المناطق اللي فاقده فيها الاحساس
والاسهم تبين كيف يرجع الاحساس
مر شهر حاليا من سويت العمليه
رجع الاحساس باغلب المناطق
بس باقي الشفه العلويه والاسنان واللثه العلويه قالوا لي هي اخر شي يرجع لها الاحساس

جاء الدكتور صالح يتطمن علي بالليل وطمن اهلي ان كل شي الحمد لله تمام والامور تسهلت
و حرصني بشده اني اشرب سوائل باكبر كميه ممكنه
وقال لي لازم تمشين وكل هذا لمصلحتك عشان تتعافين بسرعه
بس نبهني عشاني اول يوم ماامشي الا بمساعدة احد و مااروح الحمام لحالي
طبعا خوفا من الدوخه بعد البنج

انتهى اليوم الاول على خير الحمد لله


اعذروني على الاطاله بس كنت حابه اشرح كل شي بالتفصيل لاول يوم بعد العمليه
واسفه جدا جدا جداا لاني تاخرت وماكتبت بالمدونه لظروف انشغالي
اتمنى انكم استمتعتوا
^_^