قبل العملية بيوم T_T

يوم الثلاثاء قبل العملية بيوم رحت لمستشفى المملكه كان معي بطاقة العائلة
بس من الربكه ومخي المشغول نسيت الاوراق اللي اعطاني اياها دكتور صالح ,,
كانت اوراق مهمه لازم تنحط بملفي ماأنلام يوم نسيتها خخخخخخ
بس من حسن الحظ ان البيت قريب وارسلوها لي اهلي

بعد فتح الملف سويت تحليل دم بعدين قابلت دكتور التخدير

طبعا سألني أسئلة روتينية مثل:

عندك امراض مثل الضغط او السكر؟
لا

عندك ربو؟
لا

تاخذين أدوية باستمرار وايش نوعها؟
قلت مافيه ادوية بس كريمات للبشره ومراهم كورتزون للاكزيما

قال عندك تحسس من شي معين؟
قلت له لا بس اعاني من الاكزيما

سويتي عمليات قبل كذا؟
قلت له سويت تعديل للحاجز الانفي
وصار مركز على هالموضوع,, صار يسال اذا عمليتي ناجحه وكيف التنفس وكشف على فتحات الانف وكتب بملفي اني مسوية تعديل للحاجز ونبه الممرضه تخبر طاقم التخدير اني مسوية عملية قبل فلازم اثناء ادخال انبوب التنفس يكون فيه حرص زياده ,,
وطبعا قال لي تصومين لا اكل ولا شرب نهائيا من الساعه 12 بالليل

قبل مايجي الدكتور جلست اسولف مع ممرضته "ميشيل" طبعا هلكتها بالاسئله بس حبوبه وراعية سوالف ماصدقت
قالت انا راح اكون معك بغرفة العمليات
فسالتها انتي من متى وانتي تشتغلين هنا
قالت 8 سنوات
وقلت لها وكم عدد عمليات الفك خصوصا مع دكتور صالح البازعي قالت اوووه كثييير
قالت السبت كان فيه بنت مسويتها ويوم الاثنين فيه رجال كان فكه السفلي بارز وسواها,, لو فعلا هي تتكلم عن د.صالح بس يعني انا كنت ثالث حاله بالاسبوع معه ماشاء الله تبارك الله جدوله مليان,,
كان اكثر شي مخوفني الغثيان قلت لها ماابغى استفرغ هههههه قالت لا تخافين فيه دكتور اسمه ابراهيم موسى هذا مره ممتاز اتوقع هو من طاقم التخدير فيمكن يهتم بزياده انه يشفط السوائل قبل ماتدخل للمعده ويعطي ادوية للغثيان
كانت تمدح نتائج عمليات الفك ,, وشفت فوق جهاز الكومبيوتر جدول للعمليات بس ماقدرت اقراه لانه بعيد بس كان ملياااااان

رجعت للبيت وكان اخر وجبه اكلتها مشاوي واكلات شاميه خخخخخ راح احتاج بروتين
كان فيه شوية توتر خصوصا لما اشوف امي لانها مو مقتنعه ابدا

جلست ارتب شنطتي طبعا فيه اغراض مهمه حرصت عليها ,,


الاغراض اللي احتجتها بالمستشفى وبعض النصائح العامة:

# قمصان باكمام طويله ومفتوحه من الامام مره مهمه,, اخذت اللي يكفيني من الملابس لمدة 5 ايام,, ان كيس لو احتجت اجلس بالمستشفى اكثر من 3 ايام.

# بنطلون ثقيل ماافضل الجنز مو مريح لكن الافضل بنطلون بجامه شتويه لان المستشفى باااارد وحتى لو سكرت المكيف احس بالبرد.

# شرابات واحد ثقيل و واحد خفيف.

# سلبرز المستشفى توفرها بس احتياطا يمكن يصير ضيق :P

# مرايه اخذت معي مراية الميك اب اللي لها وجهين ههههه مابي افوت شي :P

# فازلين مهممممممممممم جدددددددا للشفايف كانت ناشفه ومتجرحه و كنت احط كل شوي بغزارة.

# مرهم kenacomb وشخصيا افضل المرهم مو الكريم كنت استخدمه لجوانب فمي لانها مجروحه بس مااكثر احطه اول بعدين فازلين.

# اعواد قطن مهمه جداا كنت استخدمها لوضع الفازلين وبرضو فادتني لتنظيف الفم والخشم.

# اعواد اسنان خشب لتنظيف الاسنان وبرضو كنت استخدمها "بحذر" عشان اتخلص من الدم الناشف اللي نازل من خشمي بس ماانصح احد يسويها خخخخخ الا المتهورين لان مافي احساس فاللي بيضر نفسه لايدعي علي بليز لاني حذرت :D

# دفتر و قلم هي الطريقه الوحيده لايصال الكلام بوضوح :D

# مناديل مائده او منشفه صغيره وهي الافضل كنت احطها على صدري وقت الاكل.

# كاميرا مع التأكد ان البطارية فل طبعا لقطات تستحق ان يحتفظ بها ههههههه,, مرييعه :P

# (مره) شي مثل الكور طعمها مر وهي دواء عشبي من العطار نفعتني كثيير مع تورم الجفون حاطتها بمنديل في كوب صغير فيه شوي مويه امسح بها وجهي واشمها تخفف التورم وتمنع التقريص المؤلم اللي تسببه الجروح على ذمة وكالة يقولون :P
استعملتها على وجهي طبعا مخففه بمويه اول 4 ايام ووقفت تجفف البشره ولاتنفع للبشره الحساسه .

# بخاخ انف ocean-spray هم عطوني بخاخ ثاني ومش بطال بس لما طلعت من المستشفى شريت اوشن لان ميزته اقدر ابخ بأي وضعيه مااحتاج اكون جالسه فمفعوله افضل لانه يدخل لاقصى الخشم بسهوله.

# فرشاة اسنان اطفال صغيره مع اني مااستخدمتها لان الفم مورم وصعب ادخل اي شي بس ممكن تحتاجونها .

# اي شي للتسليه مصحف ,, كتب ,, ايباد
انا مااخذت معي اجهزة الكترونيه كانت عيوني تحرقني اذا ركزت على التي في يمكن لان الخشم كان مسدود فتنسد معه القنوات الدمعيه فتجف العين الله اعلم,,
بس كنت محتاجه اسمع قرآن خصوصا وقت النوم لان صار معي مثل الهذيان والهواجيس والكوابيس و اتخيل اشوف اشياء قدامي هو طبيعي مع التعب يحصل كذا,,
اشين كابوس شفته وانا بالمستشفى اني كنت لسا بالبيت ماسويت العمليه ههههههههههه ماانلام اسميه كابوس T_T
باقي الاغراض توفرها المستشفى مثل المخدات والكمادات والشراشف واكواب صغيره للشرب ,, بس لو تنضاف اشياء زياده ممكن مثل:
ادوات تسهل الاكل اللي تطلب من النت والكماده اللي تلف على الوجه تحط بالثلاجه اسهل من كمادات المستشفى مايحتاج تتثبت باليد وهذي برضو من النت.

# يفضل تقصيص الأظافر وخلو الوجه من الشعر عشان اذا انشال البلاستر مايألم,,
لكن الله يعين الشباب ههههههه بس الفازلين والمويه بتسهل المهمه.

# صباح او فجر العمليه يفضل اخذ شاور وبالنسبه للبنات الافضل بعد ماتجففين شعرك لو طويل مشطيه كله لورا و جدليه عشان مايضايق وبديهي بتدخلين غرفة العمليات بدون اي اكسسوريز لا حلق ولا خواتم ولا ربطات شعر.


مر الليل ببطء وماكان لي نفس اكلم احد
جلست اخذ لي صور تذكاريه وفيديو خخخخ << أودع وجهي القديم
بعد صلاة الفجر نمت واعترف اني نصابه لو اقول نمت ماحسيت بطعم النوم :(