يومياتي خلال العشره ايام من تقفيل الفم

ثاني يوم بعد التقفيل جاتني انفلونزا وانسد الخشم اكثر 

 طبعا الايام اللي راحت كانت حافله بالمشروبات البارده ايسكريم رايح وميلك شيك جاي فالنتيجه اكيد نزلة برد بوقت غير مناسب :/ 

 موعدي كان العصر الجو غباااار وكان المركز زحمه وتضايقت اكثر دخلت العياده و الدكتور شيك على العضه وقال كل شي تمام فخفف لي المطاطات اللي حطها امس ,, 

بدل ماكانت على كل الاسنان صارت على الجوانب بس والحمد لله صار الشد اخف 

 طبعا لازلت استخدم الابره اللي كرهتها قبل مااتعود عليها لانها متعبه بالشفط والدفع لان انبوبها مره نحيف فمره مع وجبات ماك بالصدفه ارسلوا هدايا مصاصات عريضه مع اكواب للكولا شلت الانبوب النحيف ودخلت بداله المصاص سهلت شوي عالاقل اشفط كميه كبيره 

 فترة التربيط هي اصعب مرحله من ناحية الكلام والاكل

 الفيديو التالي بنت بعد عمليتها باسبوع كانت عالفكين وتعاني من بروز بالسفلي ومربطين فمها

كنت اتكلم مثلها بالضبط ولاحظو كيف تشفط اللعاب خخخخ كنت اسوي كذا واخواني ماسكينها علي جات الحيه وراحت الحيه ههههههه

خسرت 3 كيلو خلال اسبوع وحسيت بوهن بجسمي ماقدر ابذل مجهود قوي
بعد مرور اسبوع من العمليه اخذت شاور بس ماقلت لاحد من اهلي يكون قريب توقعت اني خلاص ماراح ادوخ وهالمره طولت وانا واقفه
بس فجأه جاتني دوخه قويه وخلاص حسيت ان بيغمى علي بس الحمد لله لحقت وطلعت برا على اقرب كرسي ,,
كان الوضع فعلا خطير ويخوف لان ادنى ضربه عالوجه ممكن تكسر الفك من جديد

الدكتور حرصني اكل اقل شي 6 وجبات باليوم وقال لازم تاكلين خضار .. وجهي كان فيه شحوب
فقال لي على وصفه الله يديم النعمه بس
بروكلي وطماط وكل انواع الخضار تخلط بالخلاط وتشرب يوميا بس طبعا مااقدر اتقبل هالاشياء

بس اخذت مكملات غذائيه تعوض شوي وبرضو اللي ممكن يتقبل يشرب عصير دكتور أوز Dr.Oze green drink بس بدون الزنجبيل مو ناقصين حرق دهون :P

الوصفه كالتالي (تفاح/سبانخ/خيار/بروكلي/بقدونس/ليمون اخضر واصفر) بس ممكن استبدال الليمون بالبرتقال لان فيتامين سي يسرع امتصاص الحديد اللي موجود بالخضار المضافه وبرضو عشان الطعم ممكن اضافة مانجو او موز وتخلط بالخلاط

بالنسبه للمكملات الغذائيه شريت هذي الاشياء

حليب انشور بالفانيلا

حبوب حديد " فروز " و شراب ملتبال فيتامينز واقراص فيتامين سايل الفواره

كل هذي الاشياء اخترعتها من راسي الدكتور اعطاني الضوء الاخضر من شاف الصيدليه اللي جايبتها للمستشفى خخخخخ وكل ماقال اصرف لك هذا اقوله لا معي هههههههههه فاكيد قال بنفسه شكلها بتدبر نفسها :P

قائمة الاكل :

طبعا انا انسانه بالاكل مو كل شي اتقبله وكل شي مطحون يجيب لي غثيان من مجرد ماتطيح عيني عليه وشي اسمه حلبه واشياء شعبيه مااكل :D
فهذا اللي كنت اكله :

عشقي الصباح سريلاك بالقمح مع حليب انشور
ممكن كورن فليكس مطحون مع حليب
عصير التمر

بالنسبه للغدا اي نوع شوربة ممكن خضار مع اللحم لكن يطغى البطاطس عليها او شوربة عدس
لبن او عصير

العشا نفس الشي شوربه و اي شي حالي ,, اكثر شي دانيت بالتشوكلات واخففه بحليب تشوكلات عشان يصير سايل وكل يوم الميلك شيك شي اساسي مع العشا

كنت ادبل كل وجبه .. مثلا فطور اول و فطور ثاني .. غدا اول وغدا ثاني فالتوتال يصير 6 وجبات اكل من اللي يبقى بالوجبه الاولى واضيف بعض الاشياء لو حبيت

مافي شي معين حرصت عليه بس الدكتور حذرني من الحليب والاكل الغني بالدهون اول الايام لان المعده يمكن تكون حساسه بعد الصيام والبنج بس من بعد ماطلعت من المستشفى الخيار مفتوح .. فكل شخص ورغبته بس اهم شي يكون التركيز عالاطعمه الغنيه بالبروتين عشان يسرع التئام الانسجه وطبعا الحديد برضو مهم

الابره استغنيت عنها بعد كم يوم لانها طفشتني فصرت اشرب بالكوب والسوائل عادي تدخل بين الاسنان
والتنظيف استخدم فرشاة اطفال لانها صغيره وناعمه وبرضو اعواد قطن للاماكن القريبه من الجروح وشي اكيد غسول او موية وملح

خلال العشره ايام شافني الدكتور 4 او 5 مرات وكل مره كان اهم شي التنظيف ويشيك على العضه

بالنسبة للالام الحمد لله ماكان فيه اي الم بس كان يضايقني الم الشفه العلويه لما ارفعها و الاحساس بالشد بسبب المطاطات وانسداد الانف

التورم كان كل يوم لي شكل يوم مورم ويوم خفيف واحيانا جهه تصير مورمه اكثر من الثانيه خصوصا الجهه اللي انام عليها


هذي تقريبا يومياتي بالايام اللي قضيتها وفمي مقفل

موعد تقفيل الفم .. وبدأت المعاناه :(

اول زياره للجراح بعد العمليه كانت الاحد 10-7-2011 لتقفيل الفم بالمطاطات عشان تاخذ العضه والعضلات وضعيتها

وصلت للمركز العصر
دخلت العياده ,, اول شي جات المساعده ونظفت لي اسناني والجرح باعواد قطن ومضمضه ومحلول داخل ابره صغيره عشان تنظف مابين الاسنان ,,
كانت الغرز تألللللللم مع الرفع خصوصا المنطقة الأماميه من الشفه العلويه بس كان ضروري التنظيف وانا بالبيت ماراح اقدر انظف بسهوله
لان الفم كله مورم وماراح اقدر اشوف ,, وهي طبعا ماعندها دلع لازم تنظيف عميق عشان ماتصير التهابات ,, تحملت حتى خلصنا

بعدين جاء الدكتور وفحص الفم والاسنان وجا وقت تركيب المطاطات
طبعا كل هذيك الايام كان فمي مفتوح ماقدر اسكره اسناني تضرب بالسبلنت اللي مركب بفمي فبسبب هالوضع كنت احس بالم بفكي السفلي لانه مجهد طول الوقت مفتوح
فقال لي قدمي فكك السفلي وعضي فقدرت اسكره
بالبدايه حط أول دفعه من المطاطات يمكن 4 ووقف قال راح اعطيك 10 دقايق راحه لان عضلاتك تقاوم الحين مع الشد
طلع وجلست انتظر فعلا كنت احس المطاطات مره شاده على اسناني بعدها رجع وركب الدفعه الثانيه على كل اسناني
طبعا فمي مااقدر افتحه ابدا ولا نص ملم فكان الشد مره قوي والمه مثل شد التقويم فطلبت يصرف لي بروفين

قال لي معليش تحملي بالبدايه صعب وفعلا كلامي صار حتى مو مفهوم اتكلم من بين اسناني وكنت خايفه ان مدة التربيط تطول
قال بحالتك مابيك تخسرين وزن كثير خخخخخخ فاقل شي يمكن بعد 10 ايام اذا حسيت ان العضه خذت وضعها
طبعا حرص علي بالاكل واعطاني ابره استخدمها

طبعا مثل ماانتوا شايفين كيف انبوبها نحيف قال بالبدايه استخدامها بيكون صعب عليك بس بتتعودين
ركبها لي وحط لي فيها مويه وقال راح اعلمك كيف تستخدمينها وجربتها عنده دخلت الانبوب الى اخر الفم من جمب فالسوائل اقدر ابلعها بسرعه واضغط الابره على شكل دفعات

قال تقدرين تحطين فيها اي شي الحليب والعصيرات والشوربه بس لازم مخففه بمويه وأهم شي التنظيف بعد كل استخدام

نصحني بالكمادات الدافيه والشاور الدافي يوم ورا يوم فاشتريت لي كمادات من محلات التجهيزات الطبيه بشارع الضباب

سالته اذا اقدر اغير البخاخ لاني من زمان وانا كنت استخدم بخاخ "اوشن" اذا زكمت فقال عادي استخدميه ,, وبالنسبه لي احسه افضل من البخاخ اللي صرفوه لي لاني اقدر ابخ بأي وضعيه حتى لو كنت نايمه على ظهري مايحتاج اجلس ومفعوله اقوى لانه يوصل لاقصى الخشم

وهذي صورته

قبل مااطلع قال انا باسافر لمدة اسبوع ولازم اشوفك بكره وأعطاني موعد

رجعت للبيت والالام كانت بس بالاسنان السفليه مثل الام شد التقويم
وبالنسبه للاكل كان مره صعب مافي اي مجال يدخل الا بالابره وياخذ وقت طويل كل شي مخفف بالمويه عشان يصير اسهل بالدفع
والعصيرات والشوربه لازم تكون مصفاه مضبوووط واخلطها بمويه بعد ,, ثلاث ارباع الفايده راحت خخخخخخخخ

بالنسبه للادويه طبعا لازلت اخذ المضاد والفيتامين اللي صرفهم لي الدكتور طبعا كبسولات وحبوب
لازم اكسرهم حتى تصير بودره ناعمه واخلطهم بعصير

وعشان مااخسر جزء من مقدارهم فاسلم طريقه اني اكسرهم جوا كيس بلاستيك

اليوم الثالث بعد العمليه

بالنسبه لليوم الثالث والاخير بالمستشفى كان الخشم منسد بقوووه وبدأ يالمني مكان المغذي كان وقت أخذ الأدويه عن طريق الوريد تعذيب
وبدأت معي الام البطن والغثيان
طبعا عقدتي الأزليه هي الاستفراغ فقلت للنرس وعطتني ابره للغثيان على طول
وبالنسبة لالام البطن قالت عشان مافي أكل كله سوائل ومافي تبرز فتصير غازات الله يكرمكم تألم
فطلبت لي اختي من الروم سيرفس شاي ونعناع بس رفضوا في البدايه عشان جدولي كله اشياء بارده قلنا لهم على مسؤوليتنا راح نبرده بالثلاجه
بردت لي شاي ونعناع وكثرت السكر شوي عشان يصير حالي
والحمد لله بعد ماشربته تحسن بطني

على العصر جاء الدكتور وقال راح نطلعك اليوم وضعك ممتاز و جلستك مافيها فايدة اذا رحتي للبيت بتاخذين راحتك وتتحركين اكثر
قلت له امي تبيني اجلس اكثر :D قال لو شايف انك محتاجه تجلسين هنا خليتك شهر لو تبين
والحمد لله فعلا ماكنت محتاجه لجلسة المستشفى بديت اعتمد على نفسي بكل شي خفت الدوخه واقدر اتحرك بسهوله
قال لي كنت ناوي اقفل فمك اليوم بس باخليك ترتاحين وابيك تاكلين كويس هاليومين لان وراك رجيم قاسي :(
واعطاني موعد الاحد بمركز الحبيب
وقالي تقدرين تاخذين شاور وخلي المويه الدافيه تنزل على وجهك

الدكتور والنرسز كانوا مره مبسوطين مني لاني مؤدبة واسمع الكلام خخخخخخ
حتى وحده من النرس تقولي
you are so nice and strong patient :D
اقولها ثانكس ماتدرين اني اكسبرت بهالموضوع لازم اصير قويه هههههه
نسيت اسمها بس عليها عيون زرق اول مره بحياتي اشوفها مااسعفني وضعي اسولف معها عن عيونها خخخخخخخ
بس رهيب كل الستف حبوبين حتى جوا مجموعه كبيره من النرسز يمكن 8 يسلمون ويسألون


بس عموما جلسة المستشفى ماكانت مريحه ,, مرررره كئيب كنت اضغط على نفسي واحاول ماافكر بالوضع الحالي
أحيانا كانت تجيني ضيقة صدر من التعب وقلة النوم
بس كل يوم يمر اسهل من اللي قبله والمريض يبدا يتعود على الوضع الغريب
كنت اكره النهار احسه مره طويل واستانس اذا جا الليل لانه بيبدا يوم جديد بيكون افضل من اللي قبله
بس اكثر شي كنت انبسط منه ويفرحني سؤال أعضاء القروب عني واقطع الوقت بالسوالف معهم
فعلا حسيت بروح الاخوه كلنا يد بيد نآزر بعض ونشجع بعض
اشكركم جميعا و الله يسهل اموركم ويوفقكم


طبعا واضح ان الدفتر مكروف خخخخ اكل وهو معي وانام وهو معي ودايم القاه معفط تحت المخده والقلم ضايع ههههههه


على الساعه 5 العصر تقريبا جهزت أغراضي وخلصت أوراق الخروج ورجعت للبيت

كان جو البيت بصراحه أريح من المستشفى وأقدر اأجلس بأي مكان مو محبوسه بغرفه,, طبعا ماحبيت اخبر احد من اقاربي عن الموضوع مابي احد يحكم علي وانا مورمه فمافي احد زارني
وبالنسبه لاهلي الكل يضحك ويسولف ويلطف الأجواء بس واضح على عيونهم انهم مستغربين من شكلي خصوصا الوالده

على الليل بدأ يزيد التورم مو مثل اول يومين وتحت عيوني كدمات خفيييييفه مايله للاصفر كان اول يومين زهر على بنفسجي بس مو واضح ابد

بغرفتي طبعا ماحبيت انام عالسرير جهزت لي كنبه مريحه انام عليها لاني ابي راسي مرفوع
لسببين اولا عشان خشمي مسدود وثانيا عشان مايزيد التورم
وغير كذا مااصير مرتاحه وانا نايمه على جمب احس بضغط على وجهي

اول ليله انام فيها بالبيت كان كلها هذيان وكوابيس واتوهم بوجود حشرات بالغرفه خخخخخخ
وامي تقولي صوت تنفسك يسمعه سابع جار :P
فعلا كان نومي مقطع بسبب انسداد الخشم وكل شوي اقوم وابخ البخاخ عشان تنفتح مجاري الهوا

وبالنسبه لليوم الرابع ماكان فيه اختلاف كبير بس التورم صار جهه اكبر من الثانيه

وقت الكلام ماكان فيه شي يالمني بس شفايفي مشدوده ومع السوالف والضحك كان قمة الالم
خصوصا الشفايف العلويه بالنص اضحك وتدمع عيوني ههههههه

ثاني يوم بعد العملية

ثاني يوم مازال التنفس صعب وبرضو ألم الحلق مازال مستمر
كان خشمي مسدود وينزف منه دم
وكانوا يحطون لي سبراي للانف عشان يروح الانسداد
بخه وحده بكل فتحه واحيانا بختين كل 6 ساعات تقريبا
واللعاب غليظ كل فتره اطلب شفط

كنت دايم احتاج ماسك الاكسجين عشان يرطب لي الانف ويكون التنفس اسهل
وحتى وانا نايمه عشان الكحه والبلغم بس طبعا النوم مقطع

تقريبا اروح للحمام 3 مرات بالساعه الوحده يمكن عشان المغذي واتوقع بقايا البنج ماتروح الا مع البول الله يكرمكم

الفطور والغدا والعشا كلها اشياء بارده
ايسكريم ,,عصيرات.. كريم كراميل .. ويجيبون لي حليب بارد و زبادي بس شهيتي للاكل شبه معدومه

بالنسبه للاحساس بالتعب والدوخه كان اخف من اول يوم
بس لازال الصداع موجود

جاء الدكتور بالليل وتطمن ان كل شي ماشي تمام
قال لي انا افضل انك ماتبدأين بأكل الاشياء الدسمة هالفتره مثل الحليب او اللبن
ركزي عالموية و عالعصيرات خصوصا التفاح والمانجو
بس كنت اكل الايسكريم شي بسيط والكريم كراميل برضو شي بسيط لان البلع شوي صعب
بس كنت متحمله واضغط على نفسي
برضو كان ينصحني بالحركه والمشي
وقالي مو طول الوقت تتسطحين عالسرير تجولي بالغرفه واجلسي عالكرسي
فكنت اسوي اللي يقول لي عليه
اذا حسيت بحاجه للنوم اتسطح عالسرير
وقت الاكل او اذا جوا اهلي يزوروني كنت اجلس معهم عالكرسي

النرسز كانوا يجوني اكثر من 3 مرات باليوم يقيسون الضغط والنبض والحراره
ويعطوني الادوية والمضاد كل 8 ساعات
الادوية عباره عن 3 كبسولات
اتوقع كبسولتين مسكن وفيتامين او نوع ثاني من المضاد مو متاكده
كانت تكسرها لي وتخلطها بالعصير
وتحط لي ابره مضاد عن طريق الوريد بالمغذي

اول الايام كان التذوق مو قوي صح احس بمرارة الادويه
بس مو بدرجة كبيره
تقريبا مثل وقت الانفلونزا لما تجي تتعطل حاسة الشم والتذوق شوي :D

انتهى اليوم الثاني على خير الحمد لله
^_^

My Big Day :D,, I'm alive :P

يوم الأربعاء
5-8-1432
6-7-2011


صحيت الساعه 8 ونص
بالبدايه كنت متبلده مااحس بشي غير يمكن جاني احساس كأن عندي اختبار خخخخخ بس الحمد لله مذاكره كويس :P
تجهزت ورحت اسلم على امي !_! ساعتها بغيت انهار كانت اصعب لحظه مسكت نفسي قدامها وطلعت بسرعه مع اختي وابوي,,
وانا بالسيارة كانت لحظات صمت نزلت دمعتي غصب كنت اتمنى اني اروح لحالي ولا اشوف احد
صعب يكون الشخص سبب لقلق اهله ويشوف نظرات الخوف والترقب بعيونهم.

مستشفى المملكه قريب من بيتنا بس حسيت ان المشوار طويل مع الافكار اللي كانت بخيالي

الساعه 10 الصباح تقريبا كنت بالمستشفى
خلصت كل الاجرائات ودلوني لمكان غرفتي
العملية تبدأ الساعه 12 فكان فيه وقت كااافي للوساوس والافكار خخخخخ



الغرفه نوعا ما كبيره بالدور الرابع وفيها شباك كبير يحسسك بطول اليوم
المنطقة اللي فيها المستشفى مره هاديه حتى المستشفى هاااادي
كانت تجيني لحظات اني انا الوحيده اللي بالمستشفى خخخخخخ
تجولت بالغرفه مرتبه وحاطين لي لبس العمليات عالطاوله


بعدها دخلت النرس ومعها ملفي وسالتني اسئلة مكرره وعطتني الملف اوقع هالورقه

^
قهرني آخر بند كنت أبي احتفظ بالعظام اللي بيستأصلونها عندي ماعطوني اياها :(
هههههههه


استغليت الوقت بقراءة القرآن والاستغفار والدعاء وحسيت براحه الحمد لله
على الساعه 11 لبست وودوني حتى وصلت لغرفه صغيره قبل غرفة العمليات

الممرض اللي شايل معه ملفي احسه هادي وحزين خخخخخ
لما وصلني للغرفه الصغيره قبل غرفة العمليات وهو جالس يرتب سألني ‏
are u nervous?
I said yes a little but i'm excited at the same time
قال اوه good
بس كان هااادي و كأنه خايف خخخخ
لما طلع قال
I wish u luck and have a nice day
مادري ليش خفت بعدها هههههههه

جلست انتظر وبعدها دخل واحد من طاقم التخدير سوري او لبناني وركب لي المغذي وسالني اسئله ويحاول يلطف الجو وكل واحد يدخل يحاول يلطف الجو ولاشعوريا اضحك من غير استيعاب خخخخخخ

بعدين جا دكتوري د.صالح البازعي ومعه مساعد بس نسيت اسمه وطمني ان كل شي بيكون تمام
وقال لي روقي شكل وجهي صاير اصفر ساعتها هههههههه
سالني اذا عندي شي حابه اسأل عنه قلت له اني مسويه تعديل للحاجز الانفي زمان قال مو مشكله اذا مال راح اعدله
وبعدين بدأ يشرح لي وللمساعد وش بيسوي
نفس الكلام اللي قاله لي بزيارتي الاخيره

طبعا دكتور صالح مرررررررررره صريييييح يتكلم معي كأي جراحة مو مريضه بتدخل غرفة العمليات بعد دقيقتين ههههههههههههههههههههههه
هو عارف من الأول عدم اقتناعي بالفكين فجلس يشرح ليش بيلجأ لتقديم الفك السفلي
وقال مابيك بعد ماتقومين تتفاجأين اذا سويناها عالفكين
بس باحاول بقدر الامكان انها تصير عالفك العلوي بس
وكان معه المساعد ويشرح له برضو وأنا كل شي أسسسسسسسسمعه
!_!

خخخخخخخخخخخ طبعا اسمع وانا مادري شاقول يااقول خلاص بطلت ولا اخلصوا خدروني
مع اني سامعه هالشي منه قبل بس وقعها عظيم قبل العملية بدقايق هههههههههههه
على طول تخيلت ان الفك كله بيطلعه برا الوجه وبيتجول بين يدينهم خخخخخ

بعد ماطلعوا جلست ادعي ربي
طبعا من قبل ماادخل وانا ادعي اللهم لاسهل الا ماجعلته سهلا وانت تجعل الحزن ان شئت سهلا
اللهم اني استودعتك نفسي وعرضي وعافية بدني وبعد سماع كلام الجراح هههههه جلست اقول اللهم اني استودعتك اسناني وخشمي وجمجمتي واعصابي فاحفظهم لي
وكل دعاء او ايه تخطر على بالي جلست ارددها

بعدها دخل واحد مصري من طاقم التخدير مرره رهيب واظن هو د.ابراهيم موسى بس ماسألته
قال لي انوسنس انتي مستعده؟ ,, الحين بتدخلين طبعا انا مبتسمه خخخخخخ والله من السباهه اللي جاتني
قال توكلي على الله ماراح تحسين بشي وكلها 5 دقايق وتصحين ماتحسين بالمده ابدا
دخلني غرفة العمليات ياهي كئيبه هالغرفه ومظلمه
وبكل كورنر جهاز كبير مناظير واجهزة قياس النبض والقلب
بس كل الطاقم يتحركون بسرعه كانهم نحل كل واحد ومهمته
جلسوا يركبون الاجهزة على صدري ويدي
حطوا لي قياس الضغط وبرضو على اصبعي قياس النبض

يمكن بدأ الارتباك يبين خخخخ
جلس الدكتور المصري يقرا علي و يقول لي على ادعية ارددها وراه ومره كلامه ريحني الله يجزاه خير
حط لي قطرات بخشمي يمكن عشان ترطب المجرى قبل مايدخلون انبوب التنفس

التخدير كان عن طريق ابره بالوريد بديت اتخدر وبدت الاصوات تروح وحطوا لي الماسك تنفست و بعدها ماحسيت بالدنيا

طبعا العمليه هي رفع وترجيع للفك العلوي
وهذا مقطع من غرفة العمليات مباشره لمريض عنده تقريبا نفس مشكلتي

تــــحـذيــــر

المقطع دموي وفيه تكسير عظام :P
يبيله قلب قوي :)




طبعا مر الوقت بدون مااحس مادريت الا هم يقوموني الدكتور المصري اللي كان يهزني عشان اتنفس و اصحى
ويقول قولي وراي الحمد لله انتي بخير وخلصتي
افتحي عيونك

كنت اسمع اصوات الاجهزة واسمعهم بس مو مستجيبه للي يقولونه كأني بحلم
كنت احس باحد يهزني ويربت على كتفي عشان اصحى
بس كنت ابي انااام ومو مستوعبه انا وين ومين اللي يكلمني
كان يقولي خذي نفس عميق
ويسالني اذا اسمعهم كنت اهز راسي بايه
قالي افتحي عيونك و تكلمي قولي الحمد لله
استجابتي ضعيفه بالبدايه بس شوي شوي صرت اتحرك وافتح عيوني واتكلم
اول شي سويته تحسست فكي السفلي وشفايفي السفليه فرحت كثير الحمد لله كنت احس فيها واشرت لهم فك او فكين ابي اتأكد قالوا الحمد لله فك واحد ,,
بالرغم من التعب والدوخه اللي كنت فيها بس
كان ودي اسجد سجود شكر ساعتها على هالنعمه اللي ربي تفضل بها علي
قلت لهم يطمنون اهلي


طبعا ماقصر دكتور صالح كلم اهلي وقالهم اني كويسه والعملية تسهلت على فك واحد اللهم لك الحمد والشكر
يعني العمليه استغرقت تقريبا 3 ساعات ونص

مااتذكر كم جلست بغرفة الافاقه يمكن ساعه
بعدها ودوني لغرفتي وكان اغلب الوقت دايخه وصعب افتح عيوني
كانت فيه الام نوعا ما بالفك والحلق وصداع حطوا لي كمادات ثلج حوالين الوجه وماسك الاكسجين
حسيت باهلي يوم شافوني اول مره بس كنت دايخه وماقدر افتح عيوني

بديت اصحصح شوي وقلت لاهلي ابي اشوف نفسي خخخخخخ
قال لي ابوي اصورك
قلت لا ماينفع ابي مرايتي السحريه خخخخخخخخ
لما شفت وجهي بصراحه منظر مقرف خخخخخخخ

كيف الصوره حلوه :D
مالقيت صورة تصف الحاله ومالقيت الا هالحلوه خخخخ مره نظيفه ومرتبه عكس واقعي المرير :P

كان وجهي يلمع وكأنهم ممسحين وجهي بماده لونها أصفر يمكن معقم الله اعلم
وفيه شوية بقع دم متناثره بالارجاء :P
جفوني كانت مره متورمه وحمرا حتى رموش عيني احس عليها شي ناشف
طبعا مثل مانتوا شايفين بالصوره خشمي كان ينزف
وحتى كان شكل الخشم يضحك صايره فتحه اكبر من فتحه و التب راقي لفوق صاير مثل الزحليقه
وفيه جروح على زوايا الفم والشفايف مره متورمه
بس باقي الوجه مو متورم كثير
كانوا حاطين لي بلاسترز على منطقة الشنب فوق الشفه العلويه وهذا يخفف من حدة التورم
خصوصا لاني مسوية استطاله للشفه العلويه
وبرضو بلاستر صغير بين حواجبي قالي الدكتور فيه جرح صغير بين الحواجب بسبب مسمار القياس
اتوقع نفس المسمار اللي استخدموه عالمريض بمقطع الفيديو اللي فوق :D

بالنسبه للالام مافيه الام قويه ابد اكثر شي صداع بس أقدر أصف الوضع بانه عدم راحة اكثر من آلام
لان وضعية الفك جديده والسبلنت اللي حاطينه بفمي كان مصعب الكلام
وبوجوده احس تسكير الفم صعب كان طول الوقت فمي مفتوح وينشف لاني اتنفس منه


هذا السبلنت قطعة بلاستيكيه شبه شفافه تنحط عالاسنان العلويه


شكلها بفمي مثل هذي الصوره


بس أنا ماربطوا فمي بالمطاطات بالبدايه
كنت اقدر افتح فمي

اكثر شي كان يضايق هو الم الحلق بسبب انبوب التخدير
وانسداد الخشم
كانت عيوني حمرا ومااحب اركز ع التي في
طول الوقت دايخه وكل شوي انام

كانوا مانعين مني الاكل والشرب حتى كملت ساعتين من وصولي لغرفتي
بعدها اعطوني شوية مويه بارده وقالوا حاولي تشربين
واذا مااستفرغتي نعطيك اول وجبه بعد ساعتين

الشرب اول مره كان شوي صعب
اعطوني اكواب صغيره للشرب



كنت احس ان المويه بسرعه تنبلع بغيت اشرق خخخخخخ
مو مثل اول فيه مسافه تمشي فيها السوائل هههههههه
قال الدكتور عشان رجعنا الفك كثير بتحسين بهالشي طبيعي بتتعودين بعدين
والشي الثاني اللي لاحظته
كنت لما ابلع او لما اسكر فمي واسناني اللي تحت تضرب بالسبلنت
احس فكي يتحرك هههههههه مادري وسواس او صدق يتحرك :P
لما قلت للدكتور قال لا لسا ماتعودتي عالسبلنت لما تضربين فيه يتحرك ,, بس مو الفك يتحرك

بعد مرور ساعتين جابوا اول وجبه
كانت ايسكريم وعصير تفاح
كنت اضغط على نفسي عشان اشرب واكل بالرغم من وجود الم الحلق كان البلع صعب

بالنسبه للعاب كان اول يوم غليظ وكثير
بعد مااشرب او اكل اطلب النرس عشان تشفطه لي
بس ماكان فيه نزيف من الفم شي بسيييط مره

بالنسبه للاحساس
كان نص وجهي تقريبا مااحس فيه ابدا
من بداية جفوني السفليه الى شفافي العلويه
طبعا شامله الخدود والخشم والاسنان العلويه واللثه والشفايف العلويه
تقريبا اقدر اصف حدوده من خلال هذي الصوره

المربع هو حدود المناطق اللي فاقده فيها الاحساس
والاسهم تبين كيف يرجع الاحساس
مر شهر حاليا من سويت العمليه
رجع الاحساس باغلب المناطق
بس باقي الشفه العلويه والاسنان واللثه العلويه قالوا لي هي اخر شي يرجع لها الاحساس

جاء الدكتور صالح يتطمن علي بالليل وطمن اهلي ان كل شي الحمد لله تمام والامور تسهلت
و حرصني بشده اني اشرب سوائل باكبر كميه ممكنه
وقال لي لازم تمشين وكل هذا لمصلحتك عشان تتعافين بسرعه
بس نبهني عشاني اول يوم ماامشي الا بمساعدة احد و مااروح الحمام لحالي
طبعا خوفا من الدوخه بعد البنج

انتهى اليوم الاول على خير الحمد لله


اعذروني على الاطاله بس كنت حابه اشرح كل شي بالتفصيل لاول يوم بعد العمليه
واسفه جدا جدا جداا لاني تاخرت وماكتبت بالمدونه لظروف انشغالي
اتمنى انكم استمتعتوا
^_^

قبل العملية بيوم T_T

يوم الثلاثاء قبل العملية بيوم رحت لمستشفى المملكه كان معي بطاقة العائلة
بس من الربكه ومخي المشغول نسيت الاوراق اللي اعطاني اياها دكتور صالح ,,
كانت اوراق مهمه لازم تنحط بملفي ماأنلام يوم نسيتها خخخخخخ
بس من حسن الحظ ان البيت قريب وارسلوها لي اهلي

بعد فتح الملف سويت تحليل دم بعدين قابلت دكتور التخدير

طبعا سألني أسئلة روتينية مثل:

عندك امراض مثل الضغط او السكر؟
لا

عندك ربو؟
لا

تاخذين أدوية باستمرار وايش نوعها؟
قلت مافيه ادوية بس كريمات للبشره ومراهم كورتزون للاكزيما

قال عندك تحسس من شي معين؟
قلت له لا بس اعاني من الاكزيما

سويتي عمليات قبل كذا؟
قلت له سويت تعديل للحاجز الانفي
وصار مركز على هالموضوع,, صار يسال اذا عمليتي ناجحه وكيف التنفس وكشف على فتحات الانف وكتب بملفي اني مسوية تعديل للحاجز ونبه الممرضه تخبر طاقم التخدير اني مسوية عملية قبل فلازم اثناء ادخال انبوب التنفس يكون فيه حرص زياده ,,
وطبعا قال لي تصومين لا اكل ولا شرب نهائيا من الساعه 12 بالليل

قبل مايجي الدكتور جلست اسولف مع ممرضته "ميشيل" طبعا هلكتها بالاسئله بس حبوبه وراعية سوالف ماصدقت
قالت انا راح اكون معك بغرفة العمليات
فسالتها انتي من متى وانتي تشتغلين هنا
قالت 8 سنوات
وقلت لها وكم عدد عمليات الفك خصوصا مع دكتور صالح البازعي قالت اوووه كثييير
قالت السبت كان فيه بنت مسويتها ويوم الاثنين فيه رجال كان فكه السفلي بارز وسواها,, لو فعلا هي تتكلم عن د.صالح بس يعني انا كنت ثالث حاله بالاسبوع معه ماشاء الله تبارك الله جدوله مليان,,
كان اكثر شي مخوفني الغثيان قلت لها ماابغى استفرغ هههههه قالت لا تخافين فيه دكتور اسمه ابراهيم موسى هذا مره ممتاز اتوقع هو من طاقم التخدير فيمكن يهتم بزياده انه يشفط السوائل قبل ماتدخل للمعده ويعطي ادوية للغثيان
كانت تمدح نتائج عمليات الفك ,, وشفت فوق جهاز الكومبيوتر جدول للعمليات بس ماقدرت اقراه لانه بعيد بس كان ملياااااان

رجعت للبيت وكان اخر وجبه اكلتها مشاوي واكلات شاميه خخخخخ راح احتاج بروتين
كان فيه شوية توتر خصوصا لما اشوف امي لانها مو مقتنعه ابدا

جلست ارتب شنطتي طبعا فيه اغراض مهمه حرصت عليها ,,


الاغراض اللي احتجتها بالمستشفى وبعض النصائح العامة:

# قمصان باكمام طويله ومفتوحه من الامام مره مهمه,, اخذت اللي يكفيني من الملابس لمدة 5 ايام,, ان كيس لو احتجت اجلس بالمستشفى اكثر من 3 ايام.

# بنطلون ثقيل ماافضل الجنز مو مريح لكن الافضل بنطلون بجامه شتويه لان المستشفى باااارد وحتى لو سكرت المكيف احس بالبرد.

# شرابات واحد ثقيل و واحد خفيف.

# سلبرز المستشفى توفرها بس احتياطا يمكن يصير ضيق :P

# مرايه اخذت معي مراية الميك اب اللي لها وجهين ههههه مابي افوت شي :P

# فازلين مهممممممممممم جدددددددا للشفايف كانت ناشفه ومتجرحه و كنت احط كل شوي بغزارة.

# مرهم kenacomb وشخصيا افضل المرهم مو الكريم كنت استخدمه لجوانب فمي لانها مجروحه بس مااكثر احطه اول بعدين فازلين.

# اعواد قطن مهمه جداا كنت استخدمها لوضع الفازلين وبرضو فادتني لتنظيف الفم والخشم.

# اعواد اسنان خشب لتنظيف الاسنان وبرضو كنت استخدمها "بحذر" عشان اتخلص من الدم الناشف اللي نازل من خشمي بس ماانصح احد يسويها خخخخخ الا المتهورين لان مافي احساس فاللي بيضر نفسه لايدعي علي بليز لاني حذرت :D

# دفتر و قلم هي الطريقه الوحيده لايصال الكلام بوضوح :D

# مناديل مائده او منشفه صغيره وهي الافضل كنت احطها على صدري وقت الاكل.

# كاميرا مع التأكد ان البطارية فل طبعا لقطات تستحق ان يحتفظ بها ههههههه,, مرييعه :P

# (مره) شي مثل الكور طعمها مر وهي دواء عشبي من العطار نفعتني كثيير مع تورم الجفون حاطتها بمنديل في كوب صغير فيه شوي مويه امسح بها وجهي واشمها تخفف التورم وتمنع التقريص المؤلم اللي تسببه الجروح على ذمة وكالة يقولون :P
استعملتها على وجهي طبعا مخففه بمويه اول 4 ايام ووقفت تجفف البشره ولاتنفع للبشره الحساسه .

# بخاخ انف ocean-spray هم عطوني بخاخ ثاني ومش بطال بس لما طلعت من المستشفى شريت اوشن لان ميزته اقدر ابخ بأي وضعيه مااحتاج اكون جالسه فمفعوله افضل لانه يدخل لاقصى الخشم بسهوله.

# فرشاة اسنان اطفال صغيره مع اني مااستخدمتها لان الفم مورم وصعب ادخل اي شي بس ممكن تحتاجونها .

# اي شي للتسليه مصحف ,, كتب ,, ايباد
انا مااخذت معي اجهزة الكترونيه كانت عيوني تحرقني اذا ركزت على التي في يمكن لان الخشم كان مسدود فتنسد معه القنوات الدمعيه فتجف العين الله اعلم,,
بس كنت محتاجه اسمع قرآن خصوصا وقت النوم لان صار معي مثل الهذيان والهواجيس والكوابيس و اتخيل اشوف اشياء قدامي هو طبيعي مع التعب يحصل كذا,,
اشين كابوس شفته وانا بالمستشفى اني كنت لسا بالبيت ماسويت العمليه ههههههههههه ماانلام اسميه كابوس T_T
باقي الاغراض توفرها المستشفى مثل المخدات والكمادات والشراشف واكواب صغيره للشرب ,, بس لو تنضاف اشياء زياده ممكن مثل:
ادوات تسهل الاكل اللي تطلب من النت والكماده اللي تلف على الوجه تحط بالثلاجه اسهل من كمادات المستشفى مايحتاج تتثبت باليد وهذي برضو من النت.

# يفضل تقصيص الأظافر وخلو الوجه من الشعر عشان اذا انشال البلاستر مايألم,,
لكن الله يعين الشباب ههههههه بس الفازلين والمويه بتسهل المهمه.

# صباح او فجر العمليه يفضل اخذ شاور وبالنسبه للبنات الافضل بعد ماتجففين شعرك لو طويل مشطيه كله لورا و جدليه عشان مايضايق وبديهي بتدخلين غرفة العمليات بدون اي اكسسوريز لا حلق ولا خواتم ولا ربطات شعر.


مر الليل ببطء وماكان لي نفس اكلم احد
جلست اخذ لي صور تذكاريه وفيديو خخخخ << أودع وجهي القديم
بعد صلاة الفجر نمت واعترف اني نصابه لو اقول نمت ماحسيت بطعم النوم :(

زيارتي الثالثة و الأخيرة للجراح

يوم السبت قبل العملية بأربع أيام قابلت الدكتور صالح البازعي

وهذي آخر زيارة قبل العملية عشان أسأله عن بعض الأشياء و نتناقش بالخطة

طلبت منه يبدأ بالشرح و كان انسان رائع وصريح حبيت هالميزة فيه كثير
كان يشرح لي ويتأكد اني فهمت عليه

قال لي بالبدايه انه حاط اعتبارات كثيره لحالتي يعني مقاييس الوجه و تعديل العضه يعني اللي فهمته مايبي يعدل شي على حساب شي ثاني

شرح لي الخطه وصعقت من كمية الأرقام والطريقه اللي بيحرك فيها الفك ههههههههههههههه
غير لأني طول هالسنين كنت متوقعه اني محتاجه بس رفع بمقداركبير وترجيع بسيط للفك العلوي ومتخيله ان التغير ماراح يكون كبير بدرجه كبيره

بس الخطه الجديده هي
تقليل مقدار رفع الفك العلوي الى 6 او 7 ملم مع ترجيع كبير بحدود 10 ملم O_o واحتمال تقديم الفك السفلي 2 الى 3 ملم O_o
وراح يكون فيه اجرائات ثانيه مثل رفع المنطقة الامامية من الفك العلوي اكثر من المنطقة الخلفية وهذا راح يحل لي مشكلة العضة العميقة
وغير كذا قال فيه احتمال الجأ لاستطالة الشفة العلوية هو اتوقع برايه مقدار الرفع ماراح يكفي لتغطية كل اللثه بما ان شفتي العلوية قصيره

هو صح تقنيا لما شرح لي حسيت هالخطة افضل من القديمه بس عجزت اتخيل كيف بيكون شكل وجهي
باكون انسانه ثانيه تماما ,, كنت خايفه ان كمية الترجيع الكبيييره بتعطيني شكل اكبر من عمري
والله وهو يشرح لي تخيلت وجه الساحره ام مكنسه ههههههههه ذقن بارز ,, فك علوي داخل,, وخشم طوييييل خخخخخخخ

هو بان علي القلق وكل شوي اقول وااو ههههههههههه
انا بس اللي صدمني كمية الترجيع هي اللي شتتني كثير وهو كان قلقان منها لانه لو مارجع الفك بهالكميه راح يضطر يقدم الفك السفلي
قال لي أنا مابيك تتفاجأين لو عملناها على الفكين ,, انا قررت تكون عمليتك على مسارين ياتنعمل على الفك العلوي فقط اذا الوضع سمح له لانه فيه حدود ببرد العظم عشان ماتتأثر جذور الاسنان و حدود بمقدار الرفع عشان مانصدم بقاعدة الجمجمه
و اذا ماسمح له الوضع ممكن يلجأ للفك السفلي بحيث انه يفصله من قواعده ويقدمه عشان تتضبط العضه

وش رايكم بالمصطلحات الرنانه :D ههههههههههههههههههههههههه
المصيبه ابوي كان معي ويسمع هالكلام اللطيف العذب كنت التفت عليه كل شوي اشوف تعابير وجهه خخخخخخخ

طبعا أكد لي د.صالح ان النتيجه راح تكون لصالحي
بصراحة حبيت ثقته بنفسه وهذا اللي خلاني أكون مصره لأني واثقه فيه بعد رب العالمين

بعد ماانتهى من الشرح جاء دوري بالاسئلة ومنها :


1. كم مدة الاقامة بالمستشفى؟
قال لي 3 ايام
العملية بمستشفى المملكه يوم الاربعاء 6/7/2011
واطلع من المستشفى يوم الجمعه.

2. كم راح يستمر وانا فاقدة الاحساس؟
قالي بالفك العلوي اقصى حد 6 شهور
بالفك السفلي راح يطول اكثر.

3. الى أي مدى راح يكون التغيير بالانف؟
قال قبل العملية ناخذ قياسات الانف ونحاول بقدر الامكان نحافظ عليه راح يخيط الجوانب وقال التب ماراح يتغير
بس قال اي تغيير بالفك العلوي لازم يتبعه تغيير بشكل الانف وهذا شي طبيعي وحتمي بس قال التغيير راح يكون للافضل ومناسب لوضع الفك الجديد.

4. كيف راح تكون شكل الشفايف وحجمها؟
قال الحجم ماراح يتغير بس ممكن تلاحظين ان الشفة العلوية نزلت لاني بارجع الفك العلوي ومع الاستطالة ممكن الشفه العلويه تفرش شوي بس هالشي راح يكون لصالحك.

5. هل العملية نسبة نجاحها عاليه ؟
قال انا شايف ان النتيجه بتكون جيده وان شاء الله ربي يكتب اللي فيه الخير.

6. احتاج نقل دم ؟
قال لا ماتحتاجين.

7. احتاج surgical splint و تقفيل للفم وكم مدة التقفيل ؟
قال ايه ضروري ومدة التقفيل من 10 ايام الى 3 اسابيع على حسب قوة العظم.

8. هل فيه امكانية للتحكم بالغثيان والاستفراغ؟
قال نعطي ادوية قوية للغثيان بعد العملية مباشره ويستمر مفعولها 12 ساعه
وبالنسبه للاستفراغ لو حصل فهي مو قضية كبيره.

9. كيف شدة التورم وحجمه؟
قال بعد العملية مباشرة راح تتورم منطقة الشفة العلوية وبالعادة التورم يكون كبير اول ايام العملية ويبدأ يخف بس يستمر لمدة 3 اسابيع تقريبا و بعدها يكون يوم خفيف ويوم كثير.

10. هل تنصحني بشي معين الى يوم العملية؟
قال قبل العملية مافي شي معين غير انك تتغذين كويس ولا تفكرين كثير ,, بس بعد العملية ابيك تساعدينا اغلب البنات تمر بحالة اكتئاب ويمتنعون عن شرب السوائل بسبب الم الحلق اللي يسببه انبوب التخدير ويمتنعون عن الحركه وهالاشياء تسبب مشاكل كثيره
منها الجفاف والصداع والدوخه وكل يوم يمر يكون اسوأ من اللي قبله بسبب قلة السوائل والحركه وحتى المعدة راح تتأثر لان المريض اثناء العملية يبلع كمية دم والدم اصعب شي تهضمه المعده فيحصل عسر هضم وامساك ,, قلت له لاتوصي حريص أصلا عارفه كل شي و حافظة اللي بأمر فيه خخخخخ

11. فيه تصوير فيديو للعمليه؟
خخخخخخخخ هالسؤال تحفه قال لا مافي تصوير بعدين قال اهاا دكتور عادل الهدلق خبرني ان عندك موقع وش نوعه
هههههههه انحرجت ساعتها ,, قال له ابوي ايه نبي فيديو العملية عشان ننزلها بالبلوق سبوت :P
قلت له مدونه شخصيه اتكلم فيها عن تجربتي بالتقويم والعملية انبسط بالفكره وشكرني عليها.


انتهت الزياره لكن قبل مااطلع طلب مني أمر عليه و آخذ منه اوراق تخص العملية
اخذها معي قبل ماأروح لمستشفى المملكه عشان اقابل دكتور التخدير.