آخر زيارة لدكتور التقويم قبل العملية

قبل العملية باسبوع كان عندي موعد مع د. عادل الهدلق
اخر موعد عشان يركب لي الـ surgical hooks
تقريبا 22 هوكس شي مثل المسامير الصغيره على الواير العلوي 11 والسفلي 11 بين كل 2 brackets فيه 1 hook
ماتوقعتها بتكون كثيره توقعت بس 10
5 فوق و 5 تحت

هذي صورة الهوكس


وقت التركيب ماكان مؤلم كثير بس كان يضايقني الشد والضغط لان الواير عريض
وبرضو بعد ماركبتها وخلصت ماضايقتني ولا جرحتني كثير بس وقت الكلام تضايق الشفايف شوي

طبعا قبل الموعد بيوم اهلي قالوا اجلي العملية او بمعنى ثاني خلاص مافي ,, بدأ شد الاعصاب والقلق
فكانوا مره خايفين علي ولا اقتنعوا بالموضوع ابدا

كانوا خايفين مااصوم معهم رمضان الله يكفينا شر التشاؤم ههههههههههه
بعد معاناة وافقوا

رحت لدكتور التقويم وانا مضغوطة نفسيا ضايق صدري ماودي اسوي العمليه و اهلي مو مقتنعين
طبعا رحت وصدمني بشي اعظم

اللي هو

تغيير خطة العلاج بس كنت متبلده كان يشرح ولا كنت مستوعبه وش كان يقول مصدومه هههههه
هو طبعا سبق وجلس مع الدكتور صالح و تناقشوا بالخطة

الجراح قالي بعد القياسات فك واحد لكن ماشرح لي وش راح يسوي بالضبط وشكله اخفى عني مسالة الفكين مع انه قالي انها وارده قبل بس توقعت خلاص قرر فك واحد يمكن مايبيني اجلس افكر ههههههه

الخطة اللي قبل كانت رفع الفك العلوي بمقدار كبير تقريبا 8 ملم مع ترجيع واحتمال ترجيع ايضا للفك السفلي
بس دكتور عادل قال لي شي يعتبر العكس
اللي هو رفع بمقدار اقل من 8 ملم مع ترجيع كبير
وكان فيه احتمال وارد لتقديم الفك السفلي
كان يقول لي تقديم للفك السفلي وتوقعتها زلة لسان خخخخخخخ
انا مااشوف ان عندي تراجع بالفك السفلي واللي جاء ببالي هو ترجيع للفك السفلي
حسيت نفسي مشوشه وهو يحكي
قال لي انا مااشوف انك تحتاجين لتقديم الفك السفلي
اقول له تقديم ولا ترجيع خخخخخخ قال لا تقديم
الاوتوروتيشن من وجهة نظره راح تكفي

أنا حسيت وقتها مع الضغط النفسي والصدمه بتغيير الخطه بضيقة خلق ولا عاد لي نفس للنقاش
حتى كان يقول لي عملنا لك الـ simulation
ويقول شفت الـ work up اللي عملها دكتور صالح يقصد العملية الافتراضية عالمودلز
لو نفسيتي كانت افضل ماراح اضيع الفرصه واطلب اشوفها
بس كنت اقول بالطقاق خلاص سوو اللي تبون طفشت
خخخخخخخخخخخ

حسيت الدكتور عادل مستغرب من ردة فعلي خخخخخخخخ
كنت بااارده وكلامي قليل
كان الوضع هادي ودايم يذكر اني باقوم بالسلامه ويدعي بالتوفيق وان ربي بيكتب اللي فيه الخير
يمكن توقع اني خايفه هههههههههه

جلس يشرح لي بعض التغييرات اللي بتصير بالاسنان
و المراجعات كيف راح تكون

و بعدها انتهت الزياره

زيارتي الثانية للجراح

أمس كان موعدي لعمل القياسات النهائية والـ face bow transfer

عشان ياخذون لي الـ impressions أو الطبعات أول شي شالوا الواير العلوي بس الواير السفلي كان صعب ينشال
بعدها رجعوه وبعدها جاء دور الفيس بو

هالجهاز مره funny هههههه أول شي أعض على طرف منه موجود عليه واكس
بعدين يتركب بأطراف ثانيه تدخل بالاذن وكلها تربط ببعض
لازم يكون الضغط نفس بعض على الأذنين وبعدها يوازنه ويطلب مني أكون ثابته ماأتحرك

هذي صورة الجهاز



وهذا مقطع يشرح عمل الجهاز وكيفية تثبيته




يستخدم هذا الجهاز بالحالات اللي يحتاجون الدكاترة فيها معرفة العلاقة بين الفك العلوي والجمجمه
ومو بس للعملية بعض الأحيان حتى لتفصيل طقوم الأسنان

بعد ماخلصنا من الجهاز انتظرت الدكتور يروح و يتأكد من ملائمة الـ casts أو القوالب اللي أخذوها لأسناني على الـ articulator
اللي هو الجهاز اللي يثبت عليه القوالب ويعمل عليها المحاكاة لوضع الفكين بالواقع وعلاقة الفكين ببعض داخل فمي


وهذي صورة توضح أحد أنواع الـ articulators




من خلال هالجهاز راح يعمل الجراح العملية بشكل افتراضي على القوالب الجبسية ويحدد هل أحتاج فك علوي فقط أو فكين

صب القوالب والتثبيت مع دراسة الحالة أتوقع تاخذ أسبوع

بعد كذا جاء دور العضات
شي بواكس نحيف دافي وشي بارد وشي غليظ

اللي لفت انتباهي تركيز الدكتور عالعضه وتنبيهه لي اني أعض بشكل طبيعي بدون تقديم للفك السفلي
حتى فحص طريقة عضتي وتطمن إنها صحيحه قبل مايحط الواكس
تذكرت سالفة بنت بمنتدى كان عندها عادة سيئة وهي تعض تقدم الفك السفلي
وبمرحلة القياسات للبريسز ماانتبهوا انها تعض بطريقة خاطئة
بس نباهة دكتور البريسز خلته يكتشف انها تعض بطريقة غلط وقالها لازم نعيد كل القياسات
والحمد لله انهم اكتشفوا هالشي بدري ولا عمليتها بتكون مبنيه على قياس خطأ

دكتور صالح قال لي حاليا أنتي جاهزة ومابقى الا تحديد مدى الحاجه للعملية عالفك السفلي
وقال اذا قررنا راح يحدد العملية يا بداية جولاي أو نهايته
بعد كذا مايبقى الا أروح لدكتور عادل يركب لي الـ surgical hooks

مافيه شي جديد قاله عن حالتي لانه قال لي من قبل أجلي أسئلتك الى مانحدد اذا فك علوي بس أو فكين

بس سألته عن العملية وين راح تكون بأي مستشفى وقال بمستشفى المملكه
وبالنسبه لي حسيته أفضل أكثر الدكاتره يسوون عملياتهم فيه
والمرضى اللي أعرفهم يمدحون تعاملهم المريح

هذي معظم أحداث الزيارة دايم احب اكتب بالتفصيل الممل ,, متحمسه اني اسوي العمليه باقرب فرصه
واستنى اليوم اللي اقرا كل هالاحداث وتعتبر من الذكريات
بعض الزوار يعتبر بعض اللي اكتبه too much info
هههههههههههههه بس بالنسبه لي مو معلومات بس كثر ماهي تدوين مذكرات

^_^

زيارتي الاولى للجراح

موعدي مع الدكتور صالح البازعي بالحبيب كان يوم الثلاثاء الماضي ولمشكلة
الاتصال المعتاده ماقدرت اكتب بعد مارجعت

كان الموعد فيه شوية احباط بس الحمد لله ماسبب لي صدمه لاني متوقعه :P هههههه


في البداية عمل لي الدكتور facial analysis وهو بأخذ أبعاد الوجه خطط بالقلم
واخذ القياسات بمسطرة وخيط
و برضو قاس ابعاد الفم بوضع الاسترخاء والابتسامة العريضه

تناقشنا بالابعاد اولا اللثه يطلع منها 10 ملم :( اثناء الضحك كانت اقل من كذا قبل
البريسز يعني زادت 2 او 3 تقريبا عن قبل
زاوية الانف والفم تقريبا اقل من 90 درجة وهالشي يعطي ايحاء بالبروز
شفايفي العلويه قصيرة واحتمال احتاج استطاله ويمكن اعملها اثناء العملية


مدح شغل الدكتور عادل كثييير وقال وضعية اسنانك عالطبيعه مهيأه
وواضح انها افضل من المودلز

الشيء المحبط هو المسافه اللي حطها لي الدكتور عادل بين الاسنان العلوية والسفليه
يمكن يسمونها overjet
احتمال كبير ماراح تكفي

هي لما قاسها على مااذكر قال لي 4 او 5 ملم والله يجزاه خير دكتور عادل
اشتغل عالفك السفلي كثير وحاول يرجعه باكبر قدر ممكن
عشان تصير العملية بس عالفك العلوي

بس وضعية فكي السفلي ماتحتمل اي تقديم لانه هو الريدي بوضع سليم
مافيه بروز او تراجع بس مع رفع الفك العلوي فيه شي
يسمى mandibular autorotation
هو الدوران التلقائي للفك السفلي هذا الدوران يخليه يتقدم
اثناء الاطباق لما ينرفع الفك العلوي لفوق

وطبعا لاني محتاجه رفع للفك العلوي بمقدار كبير جدا حوالي 8 ملم فلازم مع الرفع
ترجيع لاكبر مسافه ممكنه او يحصل بروز بالفك العلوي وانا الريدي مو ناقصه
زاوية الانف اقل من 90 :D
فشي وارد على وضعية فكي السفلي حاليا فتحريك الفك العلوي لورا غير ممكن
فاحتمال كبير احتاج ترجيع للفك السفلي برضو بمقدار بسيط

الدكتور يقول حالتي تعتبر معقده ومحتاجه قياسات دقيقه :(

قال لي راح يحاول بعد مايدرس حالتي يعرف الاوتو روتيشن الى اي مدى راح يسمح له
بانه يرفع ويرجع الفك العلوي
اذا قدر يرجعه بالمقدار المطلوب ماراح احتاج اي شي للفك السفلي ..

انا بالبدايه كنت رافضة اسوي شي للفك السفلي مره عاجبني شكله الحالي بس قال
لي لو احتجتي فكين وانتي رفضتي مااراح اسوي لك العملية
مع اني مقتنعه بكل الكلام اللي قاله لي من ناحية الاطباق وفاهمه ليش لازم يرجع الفك السفلي ..

جلست خلال اليومين اللي فاتت افكر واقتنعت اكثر لو فعلا القياسات اثبتت اني احتاج لفكين مالي الا ارضى


لاني جلست اتخيل انا حاليا بروز الذقن ووضعية الفك السفلي مناسب جدا بس لما
ينرفع الفك العلوي ويرجع لورا راح تكون الشفه العلوية والسطح اللي فوقها داخلين شوي
ويصير الفك السفلي بارز حبتين
this will make me look older
راح يعطيني شكل اكبر من عمري

فانا باتناقش مع الدكتور صالح بعد دراسة الحاله وباشوف امكانية لو بيرجع الفك
السفلي يشيل الكم ملم اللي بتزيد بعد الاوتو روتيشن ويرجع فكي السفلي لوضعه الحالي
وبكذا ان شاء الله ماراح يتغير شي كبير


طلب مني اعمل قياس معين اسمه face bow transfer
وهو راح يبين العلاقه مابين الفك والجمجمه


ويمكن ياخذ مني قياسات ثانيه عشان يدرس الحاله ويتناقش مع الدكتور عادل اكثر بحالتي

انا حتى ودي يكون الدكتور عادل متواجد معنا حتى دكتور صالح مفضل هالشي
بيكون مريح اكثر بالنسبه لي اني اسمعهم سوا :D

كان معي نوت كاتبه فيه الاسئلة بس من شافه دكتور صالح
قال افضل تأجلين اسالتك حتى اسوي لك الدراسه عشان اعطيك اجوبه أدق

سالته بس عن الخشم قالي بحالتك مقدار الرفع راح يكون كبير وممكن تتوسع الفتحات
بس مو لدرجة تخافين منها بس شكله العام بيكون أفضل


طبعا لسا ماحددت متى موعد العملية بس قال لي الدكتور
ان مجمل القياسات والدراسه ممكن تاخذ اسبوعين الى 3

هذا تقريبا مجمل الاحداث
^_^