و أخيراااااا

عندي مشكلة بالاتصال والمفروض ينزل هذا الموضوع بعد الظهر من يوم الخميس ( 29 ابريل ) بعد رجعتي من موعد الشد ^_^

موعدي المفروض يكون الثلاثاء اللي فات ( 27 ابريل ) بس كنت أعاني من الفلو فكنسلته ولما كلمتهم يعطوني أقرب موعد بديل لقيت المواعيد فل وأقرب شي راح يكون بعد اسبوعين.. مره زعلت لأني متحمسه كثييير لموعدي هذا كنت أحسب الأيام عشان يجي لكن من حسن حظي اتصلوا علي الأربعاء ولقوا لي حجز ملغي الخميس بعد الظهر.. خلوني أعرفكم على مارلين ياحبي لها ياناس مساعدة الدكتور عادل قالت موعدك المفروض الثلاثاء وش كانت المشكلة فقلت لها عن السبب وسألتني عن صحتي و طمنتها اني بخير تحب تهتم بالبيشنت كثير أحبها وأحب أسلوبها بالتعامل.

راح أقولكم على سر الحماس (يمكن راح يفهمني أكثر اللي قلعوا الـ premolars ) بس أكيد ان طريقة علاج الحالات تختلف من شخص لآخر راح أشرح لكم وضعي:

أسناني كانت مصفوفة بدون فراغات لكن فيها بروز فاحتجت لقلع الضواحك اللي هي الأسنان اللي ورى الأنياب راح تكون فيه سبيسز مريييعة فيبدأ الدكتور يشتغل على الأنياب يشدها حتى يكونوا بمكان الضواحك المخلوعة أما القواطع الأمامية تكون بمكانها ويكون شدها و تحريكها للداخل هي المرحلة الثانية .. طبعا تنتقل هذي السبيسز لمكان أشنع وهو بالأمام مكان الأنياب سابقا لاتسألوني عن مدى بشاعة المنظر.. كنت أقول للدكتور It's the ugliest thing ever و يرد بابتسامة ويقول طولي بالك ^_^

استمر الموضوع تقريبا 9 شهور حتى تسكرت الفراغات الخلفية للي فوق تماما بس اللي تحت الى الان almost closed بس شكل الدكتور حب يفرحني ههههههههه وبدأ اليوم بشد القواطع السفلية الأمامية كبداية للمرحلة الثانية عشان تتحرك للداخل و الموعد الجاي ان شاء الله يبدأ بالقواطع العلوية أول مابدأ الشغل حاولت أخفي ابتسامتي كنت مررره مبسوطه لان معناها راح ترجع تصطف أسناني وأتخلص من شي اسمه (ugly gaps ).

أول ماخلصت الدكتور شرح لي الوضع وايش سوى قلت له

( وأخيرااااااا ) ضحك لأنه عارف اني متضايقة جدااا من الفراغات بس الحمد لله بديت بالشي اللي كنت أتمناه من زمان اللي هو بداية لنتيجة ملموسة للبريسز وبكل تفائل أقول إنها راح تكون بيرفكت بإذن الله.

الصورة هذي توضح الفراغات بعد قلع الضواحك و تخيلوا الناب صار مكان الضرس المخلوع متخيلين البشاعة :'(

رحلة البحث و سر اختياري لفريقي الطبي

مرحبا ياحلوين.. سوري عارفه إني بخيلة على المدونة وما أضيف مواضيع بإستمرار يمكن السبب إني مو حابه ادخل بمواضيع بعيده كثير عن الهدف الأساسي للمدونة فيصعب علي ألقى موضوع مناسب أتكلم فيه.


لكن اليوم جاء ببالي هالموضوع لان كثير سألوني عن سبب اختياري لفريقي الطبي ^_^ الدكتور عادل والدكتور عثمان.. ايش السر وليش هم بالذات والفرق بينهم وبين دكاترة أكفاء وبنفس المستوى..

راح ابدأ قصتي من البداية..
طبعا للعلم أنا مركبة البريسز للمرة الثانية لان دكتوري القديم الله يسامحه مااهتم ولابلغني إن حالتي تحتاج جراحة فضيعت وقت طوييييييييييييييل عالفاضي .. فلما حسيت إن مافي نتيجة ترضيني استشرت دكتور ثاني كان قممممة اللي هو الدكتور توفيق التميمي أول ماكشف علي قال لي لو راح تقلعي أسنان ممكن نحل مشكلة البروز لكن القمي سمايل راح تزيد ايش رايك تشوفين الدكتور صالح البازعي راح يشرح لك ويفهمك أكثر فحولني عليه..

كشف علي الدكتور صالح وشرح لي المشكلة كان واضح وصرييييح للغاية وكان مشجعني إني أسوي العملية..
أول ماشرح لي المشكلة وقال لي (كسر للفك) حسيت إن الدنيا افترت فيني أنا بحياتي ماسمعت عن هالنوع من العمليات وتخيلت شكلي وأنا وجهي ملفوف بالجبس ومااتكلم ولا آكل ولا أتحرك وبعدها علاج طبيعي أسوة لأي كسر باليد أو الرجل خخخخ غير هذا العملية بمكان حساس يعني لو صار غلط لاقدر الله شلون باخبي وجهي هههههه
ليته اختار كلمة (قطع) لعظم الفك وقعها عالسمع أخف من كلمة كسر كان ماصارت لي صدمة ههههه و كان من الممكن أرجع له
بس هجييت وتناسيت الموضوع وحاولت أرضى بالأمر الواقع وانشغلت مع الدراسة ..

طبعا خلوني أقولكم إني كنت اكره دكتوري القديم وكنت اكنسل مواعيدي ومااروح بانتظام عشان كذا طولت لأني مو شايفة نتيجة تشجع ..جلست بالبريسز 5 سنوات ^_^ أوففف منه كان يتريق علي اذا ناقشته بشي وانجن لما عرف اني قررت اسوي العملية حاول يحطمني وقالي ماراح تعطيك نتيجة مادري ليش يكرهني
(شعور متبادل ^_^)

تخرجت وفضى مخي وصارت المراية عشيقتي هههههههه فبديت افكر بكلام الدكتور صالح بس حبيت اخذ أكثر من استشارة واسمع رأي دكاترة ثانيين ..سويت سيرتش على النت أبي أشوف تجارب أو معلومات عن دكاترة كويسين هنا لكن مالقيت شي يذكر فصرت كل مااروح لأي طبيب اسنان لمراجعاتي الاعتيادية للتنظيف او غيره اسأله عن هالنوعية من العمليات وهل هي منتشره او لا ياما قابلت اللي أحبطني واللي اتهمني بالجنون واللي قالي شكلك مقبول ولا تغامرين وواحد استشرته اونلاين بس كان كلامه قاسي واعترف بنفسه إن كلامه مااراح يعجبني بس هذا رأيه بكل صراحة..من جد مااعجبني مره زعلني لأنه قال لي مافي مانع تراجعي طبيب نفسي يمكن عندك body dysmorphic disorder وهو احد أنواع الفوبيا وهو رهاب التشوه الجسدي.. هو ماشافني عشان يحدد اذا مشكلتي واضحه او لا او اني فعلا اعاني من هذي الفوبيا.. الله يسامحه بغيت انهار لما قريت عن هذا المرض لان بحالاته المتقدمة ممكن المريض يؤذي نفسه فال الله ولا فاله..

لازالت رحلتي بالبحث قائمة ففي أحد مراجعاتي << حسيت إني اكتب رواية خخخخ وصتني دكتورة أشوف الدكتور زهير حيدر وفعلا رحت له وحكيت له عن رأي الدكتور صالح البازعي ومدح فيه وجلست أناقشه بالموضوع هو فعلا حسيت عنده خبرة لان صار له تقريبا (30 سنة ) بهالمجال بس ماحسيته مشجعني قالي فيه ناس كثير متعايشين مع مشكلتهم وانتي شكلك مقبول قلت له بس انا مصرة قال اذا مصرة مو مشكلة بس حطي ببالك انك راح تتعبين كثير ويمكن خشمك راح يتغير و و و.. انا عارفة انه يوضح لي كل شي بس عطاني الجانب السلبي من الموضوع بدون مايذكر لي أي ايجابيات ..

بعد كذا اصريت اني اشيل البريسز وادور لي دكتور فعلا فاهمني ويشجعني فكرت بالدكتور صالح ونويت ارجع له بس فهمت من الرسبشن انه مايسوي عملياته الا بمستشفى التخصصي فماادري هل بسهولة اقدر ادخل المستشفى ولا الموضوع يطول لاني مو حابة اتاخر.. خلال هالمدة كنت اسال بالمنتديات وتعرفت على ناس كثيير وتجاربهم كانت ناجحه ومطمئنه بس اللي لفت نظري ان اكثر جراح ينذكر بالنت كان الدكتور عثمان الطويرقي.

صار لي مسلسل حتى اقدر اوصله اولا مواعيده بالحرس ماتناسبني وعرفت فيما بعد انه يكون متواجد بعض الاحيان في عيادة الدكتور سعد الخرسة بس ربي ماكتب اني اقابله هناك.. يمكن غلطتي من البداية هي ماقررت اني ابدأ مع دكتور تقويم وهو بنفسه يحولني على الجراح كنت مصرة اشوف الجراح بالاول.

طبعا انا كنت متحمسة للدكتور عثمان لاني سمعت عنه كثييير ويقال انه يهمه الجانب الجمالي و فعلا لما قريت الـ C.V تبعه تأكدت انه double majored يعني بجانب تخصصه الأساسي في جراحة الوجه والفكين فهو متخصص بالجراحات التجميلية..

بعدها سمعت بالدكتور عادل الهدلق وقريت سيرته الذاتية واللي اعجبني بالموضوع كله انه يتعامل مع الدكتور عثمان.. ماتتخيلون كيف كنت محبطة لاني مالقيت احد فاهمني ويشجعني بقراري وكنت حاطة ببالي ان الدكتور عادل بينعاد معاه نفس السيناريو بيقولي اذا مصره ماعندي مانع كنت اكره هالكلمة طيب انا ليش جاية الا لاني ابي الحل من طبيب فعلا متحمس ....
طبعا بعد الكشف والمناقشة كنت ابي اسمع رايه بوضوح فقال رأيي كطبيب انتي تحتاجين للعملية جماليا ووظيفيا ونفسيا واااااااااااااااااااااااااااااااااو بغيت اطير من الفرحه و اخيرا ..من اول مقابلة حسيته بيرفكشنست ولاحظت فحصه غير فحص أي دكتور ثاني اغلب الدكاترة كانوا يركزون بس عالاسنان هو لا على ملامح الوجه كلها وقالي انتي تحتاجي تعديل للانف راح يتغير بعد العملية من جد هذا الدكتور اللي كنت اتمناه من زمان.

وغير هذا كله اهلي كانوا معارضيني كثييير بخصوص هالعملية بس لولا الله ثم الدكتور عادل ماوافقوا طمنهم ووضح لهم الموضوع والحمد لله تطمنوا كثير.. شكرا بحجم السماء دكتور عادل والله يجزاك كل خير .

طبعا تطمنت كثير للدكتور عادل وواثقة بكل قراراته وخلال زياراتي قدرت اقيمه وحسيته مختلف فعلا عن باقي الدكاترة اللي مريت عليهم من ناحية الدقة بالشغل, الشرح بشكل واضح و طولة البال يعني ماعمري سألته سؤال الا شرح لي بشكل مفصل واحيانا يشرح لي على المودلز تبعي او عالكومبيوتر على اني احس اني أبثر بيشنت عنده من كثر الاسئلة بس ماعمري حسيته يتضايق خخخخخ , حرصه على راحة المريض, حبه للمساعدة , اللباقة والاحترام, واهتمامه مو محصور بشكل الاسنان فقط يراعي انها تكون مناسبة لتقاسيم الوجه.
يعني ماشاء الله تبارك الله ونعم الطبيب.

بالنسبة للدكتور عثمان انا ماشفته الا مرة وحده لكن اخذت فكره عنه .. طبعا من قبل مااقابل الدكتور عادل وانا سامعه عن الدكتور عثمان بس ماقررت اني اعمل العملية عنده الا بعد ماتاكدت انه يهتم بالجانب الجمالي وترشيح الدكتور عادل له كان اهم دافع لقراري لاني واثقة فيه.. و على انها مقابلة وحده حسيت فعلا انه وده يرضيني ويعدل أي شي مضايقني وكان يسالني عن مقاييسي الجمالية بحجم الشفايف و شكلها مع الاسنان و شرح لي التغير اللي راح يصير للانف وان شاء الله راح يكون فيه لقاءات ثانية تسبق العملية.

بالمختصر المفيد هدفي من هذه الجراحة تجميلي اكثر من وظيفي عشان كذا كنت حريصة على وجود دكتور يفهم بالتفاصيل الجمالية ويراعي نفسية البيشنت وهذا سر اختياري لهم..

كثير من جراحي الوجه والفكين يتشجعوا اكثر انهم يعملوا عمليات للمرضى اللي عندهم تشوهات خلقية او اصابات بالفك من الحوادث وهي مهمة انسانية فعلا بس لما يجي بيشنت مضايقته ابتسامته اوشكل اسنانه لوجود بروز او مشكلة بالفك مأثره على جماله ونتيجة لذلك يفقد الثقة بنفسه ويتعب نفسيا مو المفروض يلقى من يساعده !! الصحة النفسية مثلها مثل الصحة الجسدية..

وكلامي أيضا موجه للعوائل والأصدقاء والمقربين لما فيه احد تحبونه يحتاج لهذي العملية لازم تفهمونه قبل لازم تعرفون وجهة نظره ونفسيته لازم توقفون معاه وماتكونون ضده.. اعرف ان اهلي وحبايبي خايفين علي ويعتبرونها مغامرة أو خايفين ان شكلي راح يتغير كثير وهم متعودين على شكلي الحالي بس العملية راح تعدل لي مشكلة.. شكلي راح يكون هو الاصل اللي المفروض يكون عليه لاني راح اعمل عملية لارجاع الفك لوضعه الطبيعي.. ومادام الشخص فعل بالأسباب و لقى الدكاترة اللي يثق فيهم فالتوفيق من رب العالمين و ماعليكم ياحبايبي إلا الدعاء والمساعدة
^_^

,, تحديث ,,

حبيت اضيف لهذا الموضوع بعض التحديثات اللي وردت بتغيير رايي باختيار الجراح

طبعا مرت ايام طويله وعرفت ان تكاليف الجراحه مع الدكتور عثمان كبيره جدا واحترت خصوصا ان اهلي وقتها مو مقتنعين ولا ابي اي شي يعقد الموضوع
فقررت اختار الدكتور صالح البازعي ويارب لك الحمد والشكر توفقت معه انسان رااااائع جدا ومتمكن وواثق من نفسه لابعد درجه
شرح لي حالتي بأدق التفاصيل وكان صريح معي فيما يخص مدى حاجتي للجراحة على كلا الفكين وبين لي الاسباب
وكان حريص جدا على تهيأتي نفسيا للتغيير وينصح باستمرار على التغذيه وعلى الاشياء اللي لازم اركز عليها بعد العملية
انسان يحب شغله كثير ومخلص جدا ولبق ومريح بالتعامل خصوصا فيما يتعلق بالاسئله ماكنت اتردد اسأله عن أي شي يجاوب بالتفصيل
هو من قبل كان ببالي بس توقعت صعب اوصل له لان دخول مستشفى التخصصي مو سهل ولا كنت عارفه وقتها اذا فيه بزنس سنتر عندهم او لا
والحمد لله سويت العمليه عنده بمستشفى المملكه وتسهل كل شي معه بعد توفيق رب العالمين
عمل كل جهده عشان تصير العملية على فك واحد بدون مايأثر على شكلي أو على العضه
و مع اني لسا صار لي اسبوعين من سويت العمليه بس الحمد لله مبسوطه ومتفائلة بالنتيجه وشايفه ان الدكتور مره مبسوط
ماراح انساه من دعواتي ربي يجزاه خير ويوفقه ويكثر من امثاله هو والدكتور عادل الهدلق